Friday, January 13, 2023

11 වෙනි කොටස - හදේ කොතැනක හෝ හිඳී ඔබ

 

10 වෙනි කොටසට මෙතනින් 10

11 වෙනි කොටස




දැඩි අපේක්ෂා භංගත්වයෙන් යුතුව නිවෙසට පැමිණි විශ්ව හැඳ සිටි ඇඳුමින්ම සයනයට ඇද වැටුණේය . තමා ගේ හිතුවක්කාර මනස යම්තාක් දුරට හෝ නම්‍යශීලී වූයේ පාරමී රත්මල්ගොඩ වෛද්‍යවරිය හමුවේය. එහෙත් ඇය පවා තමා ගේ අවශ්‍යතාවය වටහා නොගත්තාය. සිය මනසේ ඇති තදබල පීඩනය ඇය හමුවේ විවෘත කරන්නට යටිසිත කැමති වූයේ ඇය පිළිබඳ ව ඇතිවූ විශ්වාසය හේතුවෙනි. එසේ නොවී ඉන්නා තාක් උපදේශකයන් වෙත යොමුවන්නට තමාට හැකි නම් මේ තරම් කල් තමා මේ අන්දමට විඳවන්නේදැයි ඔහු සිතුවේ නොරිස්සුම් සහගතව ය.

"මොකද මේ ඇඳන් උන්න ඇඳුම් පිටින්ම..."අම්මා කාමරයට පැමිණ විශ්ව දෙස බලමින් ඇසුවාය. උපැස් යුවලද සකසමින් කාමරයේ වූ අසුනකට බරවුණ අම්මා දෙස විශ්ව යාන්තමින් බලා ඉවත බලාගත්තේ ය. හරිබරි ගැසී අම්මා ඉඳගත්තේ හොඳකට නම් නොවන බව විශ්වට ඉවෙන් මෙන් වැටහුණි.හිතේ තදින්ම පවතින්නාවූ නොරිස්සුම දෙගුණ තෙගුණ වන්නට අර අඳිනු ඔහුට දැනෙන්නට විය.

"උදේ පාන්දර ගෙදරින් යනව...එන්නෙ මහ රෑ වෙලා...කතා කරන්නවත් වෙලාවක් නෑ....විශ්ව...දැන් ඉතින් මේ විදියට උන්නා හොඳටම ඇති....දැන් පිළිවෙළක් වෙන්න ඕන ඔයා...." අම්මාගේ ඒකාධිපති ස්වරය විශ්ව තුල තරහව අවුස්සන සුලු වුවද ඔහු මුවින් නොබැණ ඉවසා ගන්නට තත්න දැරීය.

මම මොකක් හරි කියනකොට තමයි උඹට කතා කරන්න බැරි ....මේ දැනුත් ඔලුව අල්ලගත්තේ මං කියන දේවල් අහන් ඉන්න බැරි හින්ද නේ ...

සිය මවගේ නොනවත්වා කියවීම විශ්වගේ යටපත් වී තිබූ තරහ පාලනය කරගත නොහැකි අන්දමට ඉස්මතු කරවන්නක් විය .

පින් සිද්දවෙයි අම්මා ...මගේ පාඩුවේ ඉන්න දීලා පොඩ්ඩක් ඉන්නවද .....මට ඕන ඇති කසාදයක් නැහැ ....මගේ වැඩක් කරගෙන පාඩුවේ ඉන්න දෙන්න ...

විශ්ව ..දැඩි සේ පාලනය කර ගත් කේන්තියෙන් යුතුව පැවසුවේය .....

එක පාරකුත් ගැහැනියකට අහුවෙලා ...නූලෙන් බේරුණේ ...ඒකත් මගේ කල්පනාවෙ හොඳ කමට ...නැත්තං උඹ හිටපු තැන ..අද ගසුත් පැළවෙලා ....ඒ ගෑනි උඹව නාස්ති කරපු හැටියට .....

අම්මාගේ කඨෝර වදන් නොනවත්වා ගලා එද්දී විශ්ව සයනයෙන් නැගී සිටියේ දැඩි ආ වේගයෙනි .....

ඔව් ඔව් ඔව් ...මම එක පිලිගන්නවා ..ඔයාගේ මොලේ නිසා තමයි මං ඒකෙන් බේරුනේ ....එහෙමයි කියලා ඔයා කියන කියන විදියට නටන්න මට බෑ අම්මා ...මගේ ජීවිතයේ මට ඕන විදිහට ඉන්න දෙන්න ....ඕන ඕන විදිහට මාව පාලනය කරන්න මං බබෙක් නෙමෙයි ......කරුණාකරලා මේ කතාව නවත්තන්න දැන් .....

විශ්ව කාමරයෙන් පිටව ගියේ දුරටත් කාමරයට වී අම්මා සමග වාදයට පැටලුන හොත් මේ සංවාදය ඉවර වන්නේ ගෙදර බඩු මුට්ටු සෑහෙන ප්‍රමාණයක් බිඳදමා බව ඉවෙන් මෙන් වැටහුන බැවිනි .

                                                                    *** 

පාරමී රත්මල්ගොඩ සිය නවක වෛද්‍යවරයා වාට්ටුවේ වැඩ කටයුතු ඉතා දක්ෂ අන්දමින් කරගෙන යන දෙස බොහෝ ප්‍රසාදයෙන් බලා උන්නාය.ප්‍රසංගී ගැන ...ඔහු සමගින් කතාබස් කිරීමට අහම්බෙන් දින කිහිපයක්ම ඉඩ ප්‍රස්ථා සැලසුනි.

ප්‍රසංගි සහ රහල්ගේ පෙර වූ සම්බන්ධතාවය පාරමී රත්මල්ගොඩ වාට්ටුවේ සෙසු කාර්ය මණ්ඩලයට නිරාවරණය කළේ නැත . එය ඔවුන් දෙදෙනාගේම පෞද්ගලිකත්වයට හානිකර බව ඇය අවබෝධ කර ගෙන උන්නාය .

" රහල් මෙතනදි ඔයාට ප්‍රසංගිට සලකන්න වෙන්නේ තවත් එක පේෂන්ට් කෙනෙක් විදියට පමණයි ...කිසිම විශේෂත්වයක් මෙතැනදී දක්වන්න යන්න බැහැ ...ඔයා ඒකට එකඟද ...?"

එබඳු දවසක සාකච්ඡාව අවසානයේදී පාරමී සිය නවක වෛද්‍යවරයාගෙන් ඇසුවේ ඉදිරි ප්‍රතිකාර කටයුතු සම්බන්දෙන් කතාවෙන අතරතුරේදීය .

" ඔව් මැඩම් ...මම මගේ රාජකාරියට පෞද්ගලික ජීවිතේ කිසිම දෙයක් මැදිහත් කර ගන්නේ නැහැ ...ප්‍රසංගිට තවමත් මාව හඳුනා ගන්නත් බැහැ ...එයාගෙ මතකය කියන දේ කවදා කොහොම එයිද කියන එක තවම හිතාගන්න බැහැ නේ ...."

රහල් පිළිතුරු දුන්නේ වගකීම් ඇති ස්වරයෙනි .

මේ සම්බන්ධයෙන් ඔයා ඉස්සරහට මොකක්ද කරන්න හිතාගෙන ඉන්නේ .....

පාරමී විමසුවේ ප්‍රසංගිගේ සියලු වෛද්‍ය වාර්තා නැවතත් කියවමිනි .ප්‍රසංගි වාට්ටුවට භාරදී ගියාට පසු ඇගේ දෙමව්පියන් ඉන්පසු කිසිම අවස්ථාවක වාට්ටුවට පැමිණියේද නැත .... පණිවුඩ කිහිපයක් තැබූවද එයට ඔවුන්ගෙන් කිසිම ප්‍රතිචාරයක් ලැබුනේ ද නැත .....

ප්‍රසංගිගේ පේරන්ට්ස්ලා එයා භාර ගන්නේ නැති පාටක් නේද මැඩම් තියෙන්නේ .....මොකද මට ආරංචි වුණා ....ගමේදි කියලා තියෙන්නේ ...අපිට දුවෙක් හිටියේ නැහැ ...එයා මැරුණ කියල අපි හිතාගෙන ඉවරයි කියලා ...මට හිතන්න අමාරුයි ඉවර වුණාට පස්සෙත් ඒ අය ප්‍රසංගිව ආපහු බාර ගනී කියලා .....

රහල් මොහොතක් බිම බලාගෙනම හඬ අවදි කළේය ....

පාරමී නිහඬව කතා කරන්නට ඉඩ දී බලා උන්නාය .

මැඩම් ..... එහෙම වුනොත් මට ප්‍රසංගිව බාර ගන්න පුළුවන්ද ....මම කියන්නේ නීත්‍යානුකූලවම ..... එයාට අනිවාර්යයෙන්ම සනීප වෙයි... ඒත් severe depression එකකට පස්සේ එයා බලාගන්න ඕන විදිය ගැන මට හොඳින් තේරෙනවා ...පොඩි දෙයක් උනත් එයා ආපහු ඒ තත්ත්වයටම වැටෙන්න ...හොඳටම ඇති .....ඉතින් මැඩම් මට වඩා වෙන කෙනෙක් කොහෙද ...එයාව හොඳින්ම බලා ගන්න පුළුවන් 

පාරමී මේ අපූරු පෙම්වතා දෙස බලා උන්නේ කියාගත නොහැකි තරමේ ලෙන්ගතු කමකිනි. නවකතා පොත් වල ,චිත්‍රපට වල මැවෙන චරිත සැබෑ ලෝකයේද මෙසේ ජීවමාන වන අන්දම විටෙක අදහා ගත නොහැකි තරම් ය.

පෙර දවසක අම්මාට මේ අපූරු කතන්දරයේ තමා දන්නා කොටස කියූමොහොතේ අම්මා පැවසූ දේ පාරමී ට සිහිවිය.

දෝණි.... ආදරේ කියන්නේ කවදා කොහේ කොතැනක ඇතිවෙයිද කියලා අපිට ම හිතාගන්න බරි දෙයක්...ඒක ඒ දෙන්නටත් එහෙමයි..මෙතනදි වැදගත්ම වෙන්නෙ ඉරණමේ බලපෑමෙන් වෙන්වුන මේ දෙන්නා ආයෙ අහම්බෙන් මේ වගේම හමුවීම....පුතා හිතනවද ඒ දෙන්නා ආයෙ එක්වෙයි කියල.....

පාරමී අම්මා කියන දේ අසා උන්නා මිසක ඒ මොහොතේ ප්‍රසංගි සහ රහල් ගේ එක්වීම ගැන සිතා තිබුණේ නැත.මන්ද මේ වන විටත් ප්‍රසංගී උන්නේ විශාදයේ මෙන්ම පානය කල අධිමාත්‍රා සහිත බෙහෙත් වල බලපෑමෙන් නිවැරදි මානසික තත්වයක නොවන නිසාය.

මට එහෙම දෙයක් ගැන හිතුණෙ නෑ අම්මා...තාම ඒ ගර්ල් ඉන්නෙ psychosis තත්වයකනෙ ...එයාව ගොඩ ගන්න ලොකු උත්සාහයක් දරන්න වෙනව...ඒ කොහොම කලත් එයාට ආයෙ eposodes ඒවිද කියලත් මට බයක් දැනෙනව...මම රහල්ට කීවෙත් මේ ළමයා සනීප කරගන්න ඉවසීමෙන් වැඩ කරන්න කියල.....

අම්මා පාරමීගේ වදන් අසා මොහොතකට සුසුමක් හෙලුවාය.

නීරෝගී කම හැර සැපතක් ලොවේ කොයින්දා කියන්නෙ ඔන්න ඔය වගේ දේවලට පුතේ....රජෙක් වුණත් ලෙඩෙක් උන දාක කොච්චර දේ තිබ්බත් අසරණ වෙනව..... ඒ කෙල්ලව කොහොම හරි ගොඩගන්න බලන්න්....ගතේ ලෙඩට වඩා හිතේ ලෙඩට බෙහෙත් දෙන්න මගෙ පුතාට පුළුවන් බව මම දන්නව...

මැඩම් ....

පාරමී ආපසු තමා ඉදිරිපස උන් රහල් දෙස බැලුවේ කල්පනා ලෝකයෙන් මිදී යමිනි....

මැඩම් එකපාරටම ලොකු කල්පනාවක ට වැටුණා.....ප්‍රසංගි ගෙ තත්වය ගැන නේද මැඩම් කල්පනා කලේ....

රහල් දුක්බර වුව මද සිනහවකින් යුතුව ඇසීය.

මට මගේ අම්මා කියපු සමහර දේවල් ලෙඩ්ඩුන්ට ට්‍රීට්මන්ට් කරන කොට මතක් වෙනවා රහල්....අම්මා ගේ දැක්ම හරි වෙනස්....අපිට ප්‍රසංගි ව ගොඩගන්න පුළුවන් වෙයි.....අනිවාර්යයෙන් මට ඒක ෂුවර්...අපි ඉන් පස්සෙ බලමු මොකක්ද කරන්න පුළුවන් දේ කියල....

පාරමී අසුනෙන් නැගී උන්නේ තරුණ වෛද්‍යවරයා ගේ මුවෙහි නව බලාපොරොත්තු සමග ඇතිවූ සිනහව දෙස මැදහත් සිතින් බලමිනි....

                                                                            *** 

දැන් උඹ මොකක්ද කරන්න හිතාගෙන ඉන්නේ ....පිස්සු බල්ලෙක් වගේ ගෙදර තියන බඩුමුට්ටු පොඩි කරලා ....මෙහෙම ක්ලබ් ගානේ ඇවිල්ලා ...බේබද්දෙක් වගේ බිබී හිටියම හරියනවද ....

නිසල් .... රෑ බෝවන තුරු අවන්හලට වී මත්පැන්වල ගිලෙමින් සිටින විශ්වගෙන් ඇසුවේ මැඩ ගත නොහැකි කෝපයකිනි. සිය මිතුරා නිස්කාරණයේ විනාශවී යනු දැක දැකම නිහඬව සිටීම ඔහුට කළ හැක්කක් නොවීය ....

වෙන මොකක්ද බං මං කරන්නේ ...අම්මා මගේ ඔළුව ම කන්න හදනවා ...එහෙන් ඔෆිස් එකේ ප්‍රශ්න.....මට තේරෙන්නෙ නෑ බං ...කිසිම දේකින් ගොඩ ඒමක් මට පේන්නෙ නැහැ .....

විශ්ව පැවසුවේ දැඩි සේ කලකිරුණු ස්වරයකිනි ....

දැන් උඹ අර doctor ගාවට යන්නේ නැද්ද .....ඒ ගියපු දවස් ටිකේ නම් උඹට මනුස්ස පාටට හිටිය ...කොහෙද උඹටත් එක දෙයක් එක දිගට කරන්න බෑනේ ...

විශ්ව අතවූ වීදුරුව වැරෙන් මේසය මත තැබීය .....

බම්බුවේ doctor .....එයාගේ බෙහෙත් ටික ඉවර උනාම මම කවුන්සලින් වලට ගියේ ...එයා ලෑස්ති වෙන්නේ ....කවුරුහරි කවුන්සල කෙනෙක් ට මේක මාට්ටු කරන්න ...ඇයි බං ...එච්චර ස්පෙෂලිස්ට් කෙනෙක් වෙලා ඒ මනුස්සයට තේරෙන්නේ නැද්ද ...කෙනෙක්ගේ personal දේවල් ඔහොම හැම එක්කෙනත් එක්කම කියන්න බැහැයි කියල ...

නිසල්ට සිනහා ගියේ විශ්වගේ කෝප සහගත ස්වරයට ම ය .....

ඇත්තටම මොකක්ද බං වුනේ.....උඹ එදා චැනලින් වලට ගියාට ..මට ඒක ගැන ඉන්පස්සෙ කිව්වේ නැහැ .....

විශ්ව හිතේ ඇතිවූ නොරිස්සූමෙන්ම එදින සිදු වූ දේ සිදුවූ දී නිසල් වෙත කියා දැමීය ....

එක අතට බං ඉතින් ඩොක්ටර්ගෙ විදිය ඒක නම් අපි මොකද කරන්නේ ...උඹටයි කියල ඒ මනුස්සය වෙනම councelling චැනල් එකක් කරන්න කියලද......

ඒ උනාට උබට ආපහු ගිහින් එක සැරයක් හරි කතා කරන්න තිබ්බා...

නිසල්ගේ වදනින් නැවත කෝපය ඇවිස්සී ගිය විශ්ව අසල වූ පුටුවකට පයින් ගැසීය ....

මම මොකටද යන්නේ .....මම ආයි කිසිම දවසක ඩොක්ටර් කෙනෙක් ගාවට යන්නේ නැහැ ...ඒ මනුස්සය ගාවට නම් කීයට වත් යන්නේ නැහැ .....

නිසල් සිය මිතුරාගේ දැඩි කෝපය හමුවේ මොහොතකට නිහඬ වූයේ යම්කිසි සැලසුමක් හිතේ තබාගෙන ය ....

ඉන්පසු එළැඹෙන බ්‍රහස්පතින්දා නිසල් පාරමී රත්මල්ගොඩ හමුවීමට ගියේ පෞද්ගලික චැනලින් සේවාවට ය . ඔහුගේ අභිමතාර්ථය වූයේ සිය මිතුරා ගැන විශේෂඥ වෛද්‍යවරිය ට කරුණු කාරණා පැහැදිලි කර දීමටය .විශ්ව මේ අයුරින් කලබලකාරී ලෙස සහ කෝප සහගත ව හැසිරීමට දිගින් දිගටම පෙළඹුණ හොත් ඔහුගේ ජීවිතයට යම් අනතුරක් වේ දැයි නිසල් බොහෝ සෙයින් බියපත් විය . 

තමන්ගේ වාරය එළඹුන විට නිසල් පාරමී ඉදිරිපසින් අසුන් ගත්තේය .

මැඩම් මං හිතන්නෙ මැඩම්ට මාව මතක නැතුව ඇති ...මං ඊට කලින් දවසේ ආවෙ මගේ යාලුවත් එක්ක මේ මීට මාස දෙකකට තුනකට විතර කලින්...මගේ යාලුවගෙ නම විශ්ව ජයසූරිය .. 

පාරමී විශ්ව ජයසූරියගේ නම කියූ වහාම ඔහුගේ මිතුරා හඳුනා ගත්තාය .

ඔව් මට දැන් මතකයි ....එයා දැන් ගිය සතියෙත් මාව හමුවෙන්න ආවා ....ඔයා කවුද ....

මම නිසල් ....ඇත්තෙන්ම මම මේ වෙලාවේ ඩොක්ටර්ව හම්බවෙන්න ආවේ ....විශ්ව ගැන ටිකක් කතා කරන්නයි ...මොකද විශ්වගේ ජීවිතය ගැන දන්නේ මම විතරයි...

පාරමී නිසල්ට සාවධානව සවන් දුන්නාය. විශ්ව ගේ ළමා වියෙහි සිටම ඇතිවූ මානසික වියවුල් ස්වභාවය නිසල් තම දැනුමේ ආකාරයට පාරමී රත්මල්ගොඩ වෛද්‍යවරිය වෙත දිගහැරියේය. දරුවෙකු හට ළමා වියේ පටන්ම අවැසි වන ආදරය, කරුණාව,දයාව මෙන්ම රැකවරණය නොලැබී යාම හා සමානව අධික නීති මතින් පාලනය වීමෙන් පෞරුෂ දුබලතා ඇතිවීමටද විශ්ව එක් උදාහරණයක් බව පාරමී වටහා ගත්තාය..

මැඩම් මෙහෙම ගියොත් විශ්ව එක්කෝ ජීවිතේ ට හානියක් කරගන්න මට්ටමට යාවි කියල මට බයක් හිතෙනව..එන්න එන්නම එයාගෙ පර්සනල් ලයිෆ් එක වගේම ජොබ් එකෙත් බිස්නස් වලත් තදබල ව ගැටලු එන්න පටන් අරන්.....

නිසල් නවතම තත්වය ගැන පාරමීට කරුණු සවිස්තරව ඉදිරිපත් කලේය

මම මැඩම්ව හමුවෙන්න මෙහෙම එන්න තීරණය කළෙත් විශ්ව මෙච්චර කාලෙකට ටිකක් හරි ඇහුම්කන් දෙන්න කැමති වුනෙ මැඩම්ට විතරක් නිසයි.....ඒ නිසා කරුණාකරල පුළුවන් නම් මේ කාරණය ගැන ටිකක් හිතල අපිට උදව් කරන්න මැඩම්....

නිසල් පිටවී ගිය පසු පාරමී සිය නළලත ට දෑත තබා මොහොතක් නිසොල්මනේ කල්පනා කලේ මින් ඉදිරියට කල හැක්කේ කුමක්ද යන්න සිතමිනි.

                                                                    *** 

කාලය ගෙවී ගියේ පාරමි රෝහලේ කටයුතු වලටම දැඩි ලෙස කාර්යබහුල කරවමිනි . අම්මා සහ මාලනී ගේ ජීවිත තමා වටා කේන්ද්‍ර කොටගෙන සැරි සැරුවද ඒ ජීවීන් දෙදෙනාටම ඉන් ඔබ්බට ළඟා කරගත යුතු ආත්මගත සැනසුමක් තිබිය යුතුයැයි පාරමී වටහා ගත්තාය .

ලොකු මැණිකේ ....දැන් මේ ගෙවල් හොයන , ලෙඩදුක් කලබල ගති අඩු උන නිසා.....අපි දෙන්න සිල් ගන්න එහෙම යමුද ....?

තමා ආලින්දයේ සිටින අතරේ මුලුතැන්ගේ දෙසින් ඇසෙන අම්මා සහ මාලනිගේ සාකච්ඡාව පාරමීගේ සවනත වැකුණේ එවන් සන්ධ්‍යා යාමයකය.

ඒක නං ඇත්ත තමයි මාලනී ....දැන් චූටි මැණිකේ වැඩකටයුතු වලට පුරුදු නිසා අපි දෙන්නා ආපහු සිල් ගන්න යමු ....කොහොමත් චූටි මැණිකේ රට ඉඳන් ආවට පස්සෙම අපිට සිල් ගන්න පන්සල් යන්න බැරිවුනා නේ ...

අම්මා මාලනී ගේ කතාව අනුමත කරමින් පවසනු පාරමීට ඇසුණි ....කෙනෙක් ජීවිතේ වියපත් භාවයට පැමිණෙන විට ආගම ධර්මය වෙත යොමුවීම සාමාන්‍ය දෙයකි . ජීවිතයේ පුරා දරන්නාවූ විවිධාකාර වගකීම් යුතුකම් හා හැලහැප්පීම් අතරේ වියපත්භාවය ළඟාවන විට ඇතිවෙන සංසුන්කම අම්මාටත් මාලනී ටත් පොදු කාරණයකි .

අම්මා සහ මාලනී අනෙක් බොහෝ කාන්තාවන් සමගින් සසඳා බැලූවිට ගත කළේ බොහෝ හැල හැප්පීම් වලින් මිදුණු ජීවිතයකි . ලද දෙයින් සතුටු වීමට සහ ජීවිතේ අනෙකකුට කරදරයක් නොවී විඳීමට අම්මා සමත්වීම මාලනීට ඉබේම පුරුද්දක් වී තිබුණි ....

පාරමී සිය ඇමතුම් දින පොත පෙරලමින් විවේකයක් ගත හැකි දිනයක් සොයා බැලුවාය . කෙතරම් කාර්යබහුල වුවත් ඒ තමාගෙන් සිදුවිය යුතු යුතුකම් සහ වගකීම් අම්මා සහ මාලනී වෙනුවෙන් ඉටුකිරීමට පසුබට විය නොයුතුයැයි පාරමී රත්මල්ගොඩ තරයේ ම සිතට ගත්තාය .....

රාත්‍රී ආහාරය ගන්නා අතරේදී පාරමී අම්මා සමග කතාබහට එකතු වූයේ තම සිතැඟි අදහස් හෙළි කරමිනි .

අම්මා ලබන සතියේ long weekend එකක් තියෙනවා ...අපි යමුද මාළිගාවටත් ගිහිල්ලා නුවර ටිකක් ඇවිදලා එන්න .....

පාරමී දෙස හිස නගා බැලුව අම්මාගේ මුහුණේ පැතිරී ගියේ ශාන්තිදායක සිනහවකි. 

මමයි මාලනීයිත් මේ කතා කර කර උන්නේ පුතේ ....ආපහු අපි දෙන්න සිල් ගන්න යමුද කියලා ...ගෙදර ඉඳල කොච්චර සිල් ගන්න හැදුවත් හිත එකඟ කරගෙන ඉන්න හරි අමාරුයි .....පරිසරයෙන් එන බලපෑමත් වැඩියි නේ ......මේ සද්ද බද්ද එක්ක බෑ

අම්මා පාරමී දෙස බලා සිනහ වෙමින් පැවසුවාය ....

අනේ ඔව් චූටි මැණිකේ ....දැන් ඉතින් හැමදේම පිළිවෙලක් වෙලා තියෙන වෙලාවේ ...අපිත් ඉන්නට ලබන පෝයෙ ඉඳලා සිල් ගන්න යන්න පුළුවන් කියන එකයි මාත් මේ ලොකු මැණිකේ එක්ක කතා වුනේ.....

පාරමීගේ හිතට යම් ප්‍රමාණයකින් වුව මට පසුතැවිල්ලක් ඇති වූයේ තමා අතින් අම්මාට සහ මාලනීට සිදුවිය යුතු යුතුකම් මගහැරී ගියා දෝ යන හැඟීමෙනි 

             

හෙලෝ පාරමී ......කාලෙකින් නේද බං ....උඹ ට ඉතින් මමම කතා කරන්න ඕනේ ...නිකමටවත් කෝල් එකක් දෙන්න එපා 

දැහැමිගේ නෝක්කාඩු වදන් පාරමීගේ ජංගම දුරකථනය පුරා නින්නාද වෙන මොහොතේ පාරමී උනේ දිවා විවේකයට නිල නිවසට පැමිණෙමිනි.ජංගමය සවනතට තබාගෙනම ආලින්දයේ වූ පුටුවෙහි ඉඳගත් පාරමි ....අත වූ අත්බෑගය පසක වූ කුඩා මේසය මතින් තැබුවාය 

හොස්පිටල් එකට ආවට පස්සෙ යකා බැඳ ගත්තු වගේ තමයි බං ...හැන්දෑ වෙනවා ගෙදර යද්දිත් ...මං කොහොමත් උඹට කෝල් එකක් දෙන්න තමයි උනෙත් අද හෙටම .....

පාරමී සිය පාවහන ගලවා දමා දෙපා නිදහස් කර ගනිමින්ම පැවසුවාය 

ඔව් කෝල් එකක් දෙන්න පස් මහ බැලුම් බල බලා ම හිටපන්කෝ.... හරි හරි කමක් නෑ ....දැන් මොකටද මට කතා කරන්න හිතං උන්න කිව්වේ 

දැහැමි සිනාසෙමින් ඇසුවාය 

අපි ලබන weekend එකේ නුවර යන්න හිතාගෙන ඉන්නේ මොකෝ කියන්නේ එනවද යන්න ....

පාරමී ඇසුවාය ...

අපි කිව්වේ කවුරු කවුරු ද යන්නෙ

අපි කියලා මට කියන්න හැමදාම උන්නේ අපි තුන්දෙනා නේ ...අම්මයි මාලනි ඇන්ටියි මමයි...යනවනම් අම්මටයි උඹටයි එන්න පුළුවන් ...දවසක් විතර නැවතිලා පොඩ්ඩක් විවේකයෙන් ඉදල එමු බං ...මේ ජීවිතයේ දුවනවා දුවනවා ඉවරයක් නෑ... අම්මයි මාලනී ඇන්ටියි පව් ...වයසට ගිහිල්ලත් ඒ මිනිස්සු දෙන්න මගේ වටේම කැරකි කැරකි ඉන්නවා මිස කිසිම ගමනක් බිමනක් යන්නෙත් නැහැ නේ ....මට මහ ගිල්ටි ෆීලින් එකක් එනවා බං 

පාරමී සිය යෙහෙලියට පැවසූයේ මහා වරදකාරී හැඟීමකිනි.

පිස්සුද බං අම්මයි මාලනි ඇන්ටියි කවදාවත් එහෙම හිතන්නේ නැහැ ...අනික ඒ මිනිස්සු දැන් උඹ ගැන හිතන් නැතුව වෙන කවුරු ගැන හිතන්නද ....ඒ වගේම උඹ කරන රස්සාව බැලුවම විවේකයක් නැති වෙන එක අහන්න දෙයක්ද ....මට නම් එන්න පුළුවන් අම්මට එන්න වෙන එකක් නෑ බං ...මං හිතන්නෙ ලබන සති අන්තෙ ලොකු අම්මලගේ ගෙදර යන්න තියෙනවා කිව්වා ....

පාරමී සිය ඇමතුම අවසන් කළේ නුවර ගමනට දැහැමි ගේ සහභාගිත්වය ස්ථීර කර කරගත්තායින් අනතුරුවය 

ගමන ඇරඹුනේ සිකුරාදා දිනයේ උදෑසනිනි.දැහැමි ගේ නිවසින් ඇයව එක්කරගත් පාරමී රිය ධාවනය කළේ අම්මාත් මාලනීත් පසුපස අසුන් ගත් පසුය.

යාලුවො දෙන්නට කතා කරන්න දේවල් තියෙන්නේ ...අපි ඉතින් ඔය වටපිට බල බල යමු මාලනී 

අම්මා දැහැමි ගේ හිස අතගා සිනහ වෙමින් පැවසුවාය . 

අපෝ මෙයත් එක්ක මොනවා කතා කරන්නද අම්මා.. මෙයා ඉතින් දවස් දෙක තුනකට සැරයක් කොහොමත් මට කෝල් එකක් දීල ඉස්පිරිතාලෙ විස්තර ඔක්කොම කියනවා නේ ..... ඒකේ මිනිස්සුන්ගෙ ලෙඩ ගැන අහලම මටත් ටිකක් පිස්සු වගේ....

දැහැමි හඬනගා සිනාසෙමින් පැවසුවාය 

ටිකක් ....හොඳ ටික .....එතන ඉන්න මිනිස්සු දිහා බැලුවම ...මෙයාට ඒ ඔක්කොටම වඩා ඔළුවේ අමාරුකම් තියෙනවා ..... 

පාරමීගේ කතාවට දැහැමි අත මිට මොලවා පහරක් එල්ල කළාය.

හ්ම්ම්..හ්ම්ම්...වාහනයක් එළවන වෙලාවේ දෙන්න දඟලන්නෙ නැතුව ඉන්නව නම් හොඳයි....මං පුතාට කිව්වනෙ ඩ්‍රයිවර් කෙනෙක් ගම්මු කියල මේ ගමනට...එහෙම නම් නිදහසේ කතාබහ කර කර යන්න තිබුණනෙ......

අම්මා නිවුණ ස්වරයෙන් කීවද ඒ බසෙහි වූයේ මඳ තරවටුවකි.

අනේ අම්මා ඩ්‍රයිවර් කෙනෙක් ගත්ත නම් අපි කොහොමද ඔක්කොම එකට මේකෙ යන්නේ ....අනික ඉතිං ගිහිල්ලා ඒ මනුස්සයටත් අපි අස්සෙ ඉන්න කියලද ...නවාතැන් ප්‍රශ්නෙත් එනවනේ ...බයවෙන්න එපා ...මට දැන් ලංකාවේ ඩ්‍රයිවින් හොඳටම පුළුවන් .......

පාරමී හිනැහෙමින් පැවසුවාය ....

ලෝකෙ කොහේ ඩ්‍රයිවින් කළත් ලංකාවේ පාරවල් වල ඩ්‍රයිවින් කියන්නේ අමුතුම දෙයක්..... මේ රටේ පාරවල් වගේම අනිත් වාහන එලවන අයත් ....අමුතුම මිනිස්සු ....වෙන රටවල් වල discipline කියන්නේ අංක එක උනාට ...අපේ රටේ වාහන එලවන අයගෙ නැත්තේම ඕකයි ......මට මුල දවස්වල කොළඹ කිට්ටුව වාහන එලවන කොට.....හැමදාම හවසට හිසරදේ .....

දැහැමි සමගින් කතාබහේ යෙදෙන අතරේ පාරමී පැවසුවාය .

ඒක නං ඇත්ත ...කොච්චර මාර්ග තදබදය තිබුනත් ....මෝටර්බයික් වගේම ත්‍රීවිල් එහෙමත් කොහොමහරි අස්සෙන් දාලා යනවා නේ ...ඒ වගේම තමයි ....මොන තරම් මාර්ග නීති තිබුණත් ඒව අනුගමනය කරන්නේ කීයෙන් කී දෙනාද ....අනික ඉතින් පාරෙ යන මිනිස්සුත් එහෙම නේ ...කහ ඉර... නෑනේ ...දැන් ඒක සුදු ඉර නේ.... ඒක පේන්න තියෙද්දිත් ඔහේ හිතෙන හිතෙන තැන්වලින් පාර මාරු වෙනවා .....

දැහැමි ඇයගේ කතාවට සම්බන්ධ වෙමින් පැවසුවාය.

කාලය ගෙවෙද්දී පරිසරයේ සිහිල ගලා එන ලකුණු පෙනෙද්දී ඔවුන් සිටියේ කඩුගන්නාවේ කන්ද නගමිනි ...

අම්මා මම චුට්ටක් පාර අයිනේ නවත්තන්න ද ......පොඩි රෙස්ට් එකක් අරගෙනම යමු නේද 

පාරමී ඇසුවාය 

අනේ නිකන් හිටපං ...උඹ ඔය මහන්සියට නෙමෙයි නවත්තන්න ඕනේ කිව්වේ ....කාරණා දෙකයි ...එකක් අලිගැටපේර ගන්න ඕන කම අනිත් එක අර බතලේගල කන්ද බලන්න ඕන කම ...හා නැද්ද කියපන් 

දැහැමි සිනාසුනේ අම්මා සහ මාලනීද එම සිනාවට එක්කර ගනිමිනි .... පාසල් විනෝද චාරිකාවක දී මෙන්ම අම්මා සහ මාලනී සමඟ ගිය ගමන් වලදී පවා ඉතා කුඩා කල සිටම පාරමීගේ මේ පුරුද්ද දැන සිටියේ ඔවුන්ය.

හරි හරි ඉතිං .....ඔය තුන්දෙන ඒක දැන දැනම නේ ....මට නිකං මඩ ගහන්නේ ...මෙතනින් යනකොට පොඩ්ඩක් නවත්තලා බතලේගල කන්ද බැලුවෙ නැත්තං මට ඒ ගමන සම්පූර්ණ නෑ වගේ .....

පාරමී සිය කැමරාව ක්‍රියාත්මක කරමින් පැවැසුවාය .ඇත මිහිදුමෙන් වැසී ගිය බතලේගල කන්ද වළාකුළු අඩු හෙයින් පැහැදිලිව දිස් වන්නට විය ... කඩුගන්නාව කන්දේ තද කොළ පැහැයට මුසුවී ගත් තුරු ලතා අතරින් තැනින් තැන ඉඳහිට පෙනෙන රතු පාටින් මල් පිපුනු පිපුණු මැයි මාර ගස් පරිසරයට එක් කළේ අමුතුම සුන්දරත්වයකි.

අපි දෙන්න දැන් කාර් එකට නැගල ඉන්නම් පුතේ ටිකක් හීතලයි වගේ 

අම්මාමා ලනීද සමගින් වාහනයට ගොඩ වූවාය ...පාරමී දැහැමි සමගින් කඩ පේලියේ එහෙට මෙහෙට ඇවිදිමින් අලිපේර කිහිපයක් මිලදී ගත්තාය .

ගෙඩි ගොඩක් ගිහිල්ලා තියාගන්න බෑනේ ...අපි එන්නේ අනිද්දා නෙ....එනකොට ගම්මු මේ ගෙඩි දෙක තුන ඇති ගිහින් කන්න ....උඹේ බඩජාරි කම නම් ඇත්තමයි.....

දැහැමි සිනාවුණේ තව තවත් අලිපේර අල්ලා බලන පාරමීටය.

හ්ම්ම්...යං යං එහෙනම් දැන් දවල්ට කන වෙලාවත් පහුවෙනව ඔය ගමන......අම්මල එපා කියද්දි දවල්ට කෑම හදන් ආවා අන්න...ඉතින් හොටෙල් එකට යන්න කලින් කොහෙ හරි ඉඳන් කාලා යමු......

පාරමී දැහැමිගේ අතින් අල්ලාගනිමින් පාර පැන්නාය.ඒ මොහොතේම එතැනින් ධාවනය වූ රියක උන් අයෙකුගේ දෙනෙත ...අහම්බෙන් ඔවුන් දෙසට යොමු වූයේ ද .....ක්ෂණයකින් එම වාහන පෙළ දිගේ ඇති තදබදය ඔස්සේ ඒ බැල්ම ඉදිරියටම යොමු වූයේද .....කෙටිම කෙටි මොහොතකය.

*************************************************************************************************** 

යලි හමුවෙමු 

කිත්මා වාසනා දහනායක 

(විසිරි සිහින)


Friday, January 6, 2023

10 වෙනි කොටස - හදේ කොතැනක හෝ හිඳී ඔබ

 09 වෙනි කොටසට මෙතනින් 09


10 වෙනි කොටස





සති දෙකක ඇවෑමෙන් පාරමී සේවයට වාර්තා කළාය. වාට්ටුවට නොගියද නිල නිවස්නයේ රැඳෙමින් පාරමී අත්‍යාවශ්‍ය රාජකාරි ඉටුකලාය. වාට්ටු භාර සෙසු වෛද්‍යවරුන් සහ සෙසු සියලුම කාර්‍ය මණ්ඩලය ඇයට ඉමහත් සහයක් දැක්වූහ. 

අපි වපුරන දේයි අපි හැම තිස්සෙම නෙළන්නෙ මැණික. පුතා අනික් අය එක්ක ඉන්න හැටියට තමයි ඒ අයගෙන් පුතාට එන ප්‍රතිචාරයත්...ඔයා නරකට සැරට නපුරට ආඩම්බරයට උන්නා නම් අද ඔය දේ ඔයාට ලැබෙන්නෙ නෑනෙ...

අම්මා පාරමීගේ හිස අතගාමින් පැවසුවාය. 

අම්මා මට උගන්නපු දේවල් නිසයි අම්මා අද මම මෙහෙම ඉන්නෙ....තාත්තා ගෙන් මට ඉගන ගන්න කාලයක් තිබුණෙ නැති වුනත් අම්මා ඒ හැමදේම මට කියල දුන්නා....මිනිස්සු එක්ක ජීවත්වෙන කොට ඒ පාඩම් මට වැදගත් වුණා අම්මා ඒ රටවල් වලදිත්.....

පාරමී අම්මාගේ උණුසුමෙහි තව තවත් ගැලෙමින් පැවසුවාය.

පසුදිනයේ පාරමී සේවයට වාර්තා කරන විට වාට්ටුවේ නව මුහුණක් දිස්ව තිබුණි. තරුණ කඩවසම් නවක වෛද්‍යවරයා සියල්ලන්ගේම හිත් ඇද බැඳගන්නා සුලු අයෙක් විය.

"ගුඩ් මෝනින් මැඩම්...ඔන්න අපිට අලුත් ඩොක්ටර් කෙනෙක් ඇවිල්ල ඉන්නව අද ඉඳන්....." වාට්ටුව භාර හෙද නිලධාරිනිය පැවසූවේ පාරමී හට ඉඳගන්නට අසුන පිරිනමමිනි.

පාරමී මඳ සිනහවකින් නවක වෛද්‍යවරයා දෙස බැලුවේය.

"ගුඩ් මෝනින් මැඩම්...මම ආවෙ ගිය සතියෙ..ඒත් මැඩම් උන්නෙ නැති නිසා මාව ඒ සතියෙ වෝඩ් එකට දැම්මෙ නෑ ....මම රහල් සිරිවර්ධන .." තරුණ වෛද්‍යවරයා පැවසුවේ පාරමී දෙස යොමු වූ බැල්මෙනි.

" හොඳයි රහල්.....එහෙනම් ඔන්න අපේ කාන්තාවන් පමණක් උන්න වෝඩ් ස්ටාෆ් එකට රහල්ව බොහොම ආදරයෙන් පිළිගන්නවා ....අපි එහෙනම් වෝඩ් රවුන්ඩ් එකක් යමුද ඩොක්ටර් චාපා...."පාරමී ඇසුවේ වාට්ටුවේ උන් අනෙක් වෛද්‍යවරියගෙනි.

කාර්‍ය මණ්ඩලය හා එක්ව රෝගින් පරික්ෂාවේ යෙදෙන අතරම නව වෛද්‍යවරයා හට වාට්ටුවේ කාර්‍යයන් ගැන පාරමී දැනුවත් කළාය.

ප්‍රසාංගීගේ සයනය අසලට පැමිණි පාරමී ඇය සමග කතාබහ කලේ සුපුරුදු හිතවත්කමිනි. 

කොහොමද ප්‍රසංගි....දැන් ඔයා බෙහෙත් බොනවද....එතකොට තෙරපි වලට හරියට යනවද.....

පාරමී ඇසූ පැණයට ඇය පිළිතුරු දුන්නේ කිසිදු වෙනසක් නැතිවමය. 

This is a suicidal attempt....so we have to manage such young cases dr Rahal...." පාරමී සිය පැහැදිලි කිරීම නවතා තරුණ වෛද්‍යවරයා දෙස බැලුවේ ඔහුගේ නිහඬබව නිසාය. ඒ ඇස් ළා රතට හැරී කඳුළක් දිලිසෙමින් තිබුණි.....

රහල්....ආ යූ ඕකේ.....

පාරමී රත්මල්ගොඩ ඊළඟ රෝගියා වෙතට යන අතරමග ඇසුවාය. කිසිවක් නොකියා බිම බලාගත් රහල් සිරීවර්ධන ඇය පසු පස පැමිණියේ යළි යළිත් ප්‍රසාංගි දෙස බලමිනි ...

තරුණ වෛද්‍යවරයාගේ මුහුණේ පෙර නොවූ විරූ අන්දමේ අඳුරක් පැතිරී ඇති බව පාරමීට හොඳින් වැටහුණි ...එය කාර්යමණ්ඩලයක් ඉදිරිපිට ඇසීම සුදුසු නොවේ යැයි එය අවබෝධයෙන් වටහා ගත්තාය.අනික් අතට මේ සියල්ල යම් අයෙකුගේ පෞද්ගලික ජීවිතයට බලපෑමක් සිදු කරයි නම් ඒ කාරණය විමසා අසා බලා දැනගත යුත්තේ ඉතා ප්‍රවේශම් සහගතව ය .

රහල්.... අපි ටිකක් කතා කරමු නේද ...අපේ වෝඩ් එකේ ඩියුටි ප්ලෑන් එක එකක් වෙනස් ඒ නිසා ටිකක් මේ ගැන ස්ටඩි කළොත් ඔයාට ගොඩක් හොඳයි ...come with me ...

පාරමී රත්මල්ගොඩ නවක වෛද්‍යවරයාට එසේ පවසා සිය කාර්යාල කාමරය වෙත ඇවිද ගියාය .රහල් ඇය පසුපසින් ඇවිද විත් කාර්යාලයේ මේසයට එහා පසින් අසුන් ගත්තේය ...

so ....let me know about you....

කරමි කතාබහ ඇරඹූයේ සුහද සාකච්ඡාවක ආකාරයකිනි .තමා හට රහල්ගේ මුහුණේ ඇති වූ වෙනස්කම් ගැන අවබෝධ වූ බව එක්වරම ප්‍රකාශ කිරීමට ඇය තීරණය කළ නොසිටියාය .කෙසේ වතුදු මෙම ගැටලුව තමා අවබෝධ කරගෙන සිටින බව ඔහුට දැන්වීමට පාරමී රත්මල්ගොඩ යම්කිසි ප්‍රමාදයක් ගත්තේ ජීවිතයට වැදගත් වන පෞද්ගලික කාරණාවක් එක්වරම අසා සිටිය යුතු නොවන බැවිනි .

තරුණ වෛද්‍යවරයා සිය කරුණු කාරණා සැකෙවින් ඇයට ඉදිරිපත් කලේය.

රහල් විසින් ඉදිරිපත් කළ යම් යම් කාරණා සමගින් සලකා බලන විට පාරමී ට ඇතිවූයේ රහල් සහ ප්‍රසංගීගේ කාරණය අතර යම්කිසි සම්බන්ධතාවයක් ඇති බවය .

Ok....රහල්...i think you can trust me ...i have observed something different from your face while in the ward round .....මට ඒ කාරණය සම්බන්ධයෙන් ඔයාට උදව් කරන්න පුළුවන් නම් ... මම කැමතියි ඒ ගැන දැනගන්න .....හැබැයි ඔයා කැමති නම් විතරයි ...හැබැයි මම හිතනවා මේ කාරණය සම්බන්ධයෙන් ඔයා ඇත්ත තත්ත්වය ප්‍රකාශ කළොත් මෙතැනදි ජීවිත කීපයක්ම ගොඩ ගොඩ දාගන්න අපිට පුළුවන් වෙයි කියලා .....

පාරමී බොහෝ ඉවසීමෙන් කතාබහ ඇරඹුවාය 

තරුණ වෛද්‍යවරයා මදක් වේලා තැතිගත් මුහුණුවරින් සිය එහි ප්‍රධාන වෛද්‍යවරිය දෙස බලා උන්නේය .පසු ඉතාම ආයාසයෙන් සිය හඬ අවදි කරන්නට විය .

මැඩම් ... ප්‍රසංගි ගැන මොනවද දන්නේ ...

පාරමී රත්මල්ගොඩ ගේ සිතෙහි තිබූ සැකය ...යළිත් වරක් තහවුරු විය 

පේෂන්ට් කෙනෙක් ඇඩ්මිට් කරනකොට දැනගන්න ඕන කරුණු කාරණා ටික මම දන්නවා ...මං ප්‍රසංගිගේ දෙමව්පියන් එක්ක එයා ඇඩ්මිට් කරන දවසේ කතාබහ කරලා යම් ප්‍රමාණයකට විස්තර දැනගත්තා ...රහල් මෙතනට සම්බන්ධ වෙන විදිය මට අනුමාන කරන්න පුළුවන් ....ඒත් මම කැමතියි ඒ රහල් ගෙන්ම මේ ගැන දැනගන්න ..... 

පාරමී ඉවසීමෙන් යුතුව හඬ අවදිකලාය.

ප්‍රසංගි ව මම අඳුනගත්තේ ඉස්කෝලේ ඒලෙවල් කරන කාලෙදි මැඩම්. මම ඕලෙවල් පාස් වෙලා ඒ ඉස්කෝලෙට ගියා ඒලෙවල් කරන්න...මම දුප්පත් පවුලක කෙනෙක් නිසා ප්‍රසංගි මට හුඟාක් උදව් කලා ඉගන ගන්න...අපි අතර සම්බන්ධයක් ඇතිවුණේත් කාලය එක්ක.....

රහල් බිම ට යොමු වූ දෙනෙතින් යුතුව හඬ අවදි කලේය. පාරමී සාවධානව ඒ හඬට ඇහුම්කන් දෙමින් සිටියාය.

ප්‍රසංගිගේ පවුල මොන වගේ එකක්ද කියලා මැඩම්ට එයාගෙ දෙමවිපියන් එක්ක කතාකලා නම් අනිවාර්යයෙන් වැටහෙන්න ඇති...මම ඒ නිසාම ප්‍රසංගි එක්ක සම්බන්ධයක් ඇතිකරගන්න මුල ඉඳන්ම අකමැති උනා....ඒත් මැඩම් ප්‍රසංගි කියන්නේ පුදුම හොඳ ළමයෙක්....ඒ වගේ පවුලක ප්‍රසංගි වගේ ළමයෙක් ඉපදුනේ කොහොමද කියල හුඟාක් අය කතා උනා.ඒ අම්ම තාත්තා ප්‍රසංගිට මේ කාරණය සම්බන්ධයෙන් ගහන්න බනින්න ගත්තාම මම ආයෙම එයාට කීවා අපි සම්බන්ධය නවත්වමු කියල...ඒත් ප්‍රසංගිගෙ ලෝකය තැනුණේ මගේ වටා....ඒක නිසා එයා කැමති වුණේ නෑ මගෙන් මිදෙන්න......

රහල් සිය හිසකේ ඇඟිලි තුඩින් ඇද්දේ ඉමහත් වේදනාවෙනි.සිය පෙම්වතිය වර්තමානයේ විඳින්නාවූ දුක්බර තත්වය ඔහුට දරාගත නොහැකි තරම් විය.

තරුණ වෛද්‍යවරයා ගේ නොසන්සුන් ඉරියව් දෙස මොහොතක් බලා උන් පාරමී , කතාව ඒ මොහොතේ නවතාලීම සුදුසු බව තීරණය කළාය...

රහල් .....අපි දැන් මේ කතාව ටිකකට නවත්වමු....ඔයා මේ කතාව වෙන කිසිම කෙනෙකුට නොකියා ඉන්නවා නම් හොඳයි කියල මම හිතනවා....because you have to think about yourself as well as prasangi.....තේරුණා නේද.....අපි නිවාඩුපාඩුවේ මේ ගැන ඉතුරු ටික කතාකරමු ...

පාරමී ගත් තීරණය ඉතා සුදුසු බව ඇයට වැටහුණේ රහල් හිස නගා හෙලූ සිනහවෙනි.

දැන් රහල් යන්න....හැබැයි ඩියුටි එකේදි ඔයා මෙතන ඩොක්ටර් මිසක් ප්‍රසංගි ගෙ බෝයිෆ්‍රෙන්ඩ් නෙවෙන බව මතක තියාගන්න....ඉමෝෂනල් වෙලා අපි මෙතන ප්‍රශ්න ඇතිකරගන්න ඕන නෑ .....තේරුණා ද ?

තරුණ වෛද්‍යවරයා සිය ප්‍රධාන විශේෂඥ වෛද්‍යවරිය ගේ හඬට හිස සලා එකඟ විය.ඇය සම්බන්ධව ඔහු සිත තුල ගොඩ නැගී ආ ගෞරවය ඉමහත් විය.පාරමී නැවත වාට්ටුව වෙත ගියේ රහල් වෛද්‍ය විවේකාගාරය වෙත යන්නට යොමු කරවමිනි.

                                                                      *** 

සති තුනක් තිස්සේ නවතා තැබූ පෞද්ගලික චැනල් සේවය යළිත් අරඹන්නට පාරමී ට සිදුවූයේ...රෝගීන් ඇයවම සොයා වෛද්‍ය මධ්‍යස්ථානයට ඇමතුම් දෙන්නට වූ හෙයිනි. වගකීමක් අතට ගත්විට එය කිසිසේත්ම ඉවත හල නොහැකි කාරණයක් බව පාරමී රත්මල්ගොඩ අවබෝධ කරගෙන උන්නාය.

ඩෙංගු රෝගය වැළඳීම නිසා ගතට මෙන්ම සිතටද අවිවේකී බවක් තවමත් දැනෙමින් තිබුණද පාරමී රත්මල්ගොඩ යළි පෞද්ගලික වෛද්‍ය සේවා ආරම්භ කලේ සුපුරුදු ලෙස සීමිත රෝගීන් ප්‍රමාණයකට ඉඩ තබමිනි.

ඒ අතරේ විශ්ව සිය කාර්‍යාලයේ බෙහෙවින් නොසන්සුන් තත්වයක පසුවිය.සිය මනස දැඩිසේ වෙහෙසවන කලබලකාරී බව ඔහුට දරාගන්නට අසීරු මට්ටමකට පැමිණ තිබිණ.

"මචං විශ්වයා...අන්න උඹේ දොස්තර නෝනා ආයෙ චැනල් එනව....ගිහින් හම්බවෙයන් අදම...නැත්නම් එක්කො උඹ නහරයක් පුපුරල මැරෙනව මේ මල පනින හැටියට...නැත්නම් උඹේ අතින් මෙතන එකෙක් දෙකෙක් මැරෙනව....." නිසල් කාර්‍යාලයේ දොර හැරගෙන පැමිණියේ විශ්ව ගේ හදිසි ඇමතුම හෙයින් කාර්‍යාලයට පැමිණි මොහොතේය. 

නිරන්තරයෙන් සේවක මණ්ඩලයට බැණ වැදීම් සහ කෑගැසීම් නිසා විශ්ව සේවකයන් අතර නොරිස්සුමට ලක් වෙමින් පැවතුණි. සේවකයන් එකිනෙකා සේවයෙන් ඉවත්ව යන්නට තැත් දරනා අවස්ථාව මීළඟට උදාවන බව නිසල් කණින් කොණින් එන ආරංචිවලින් වටහා ගත්තේය. විශ්වගේ මානසික තත්වය බරපතල ලෙස කඩා වැටෙමින් තිබෙන බව ඔහු අවබෝධ කරගනිමින් සිටියේය.

අධික කෝපයෙන් සිය කාර්‍යාලයේ ඒ මේ අත ඇවිදිමින් උන් විශ්ව එක්වනම සිය මිතුරාගේ හඬින් නැවතුණි. 

මොකක්ද උඹ කිව්වෙ.....?

විශ්ව සිය හඬ පාලනය කරගනිමින් පැවසුවේය....

කිව්ව එක ඇහුණනෙ...අන්න මං හවසට උඹට අපොයින්මන්ට් එකක් දාල ඇති....හැබැයි පුතෝ මට එන්න වෙන්නෙ නෑ අද....

නිසල් සිය ටයිපටිය මඳක් බුරුල් කරමින් පැවසීය.....

අඩෝ එහෙම කරන්න එපා...කැත වැඩ ඕවා.....

විශ්ව යළි කෑගැසුවේ අසුනට කඩා වැටෙමිනි....

ඇයි උඹ බබෙක්ද...මං උඹේ තාත්තා හරි බාප්පා හරිද....යකෝ පිරිමියෙක් වගේ පලයන්...අනික උඹ එක්ක ඔහොම හැමදාම මං ගියාම එතන ඉන්න මිසීලාත් මගෙ දිහා බලන්නෙ මූ සමනලයෙක් ද 

වගෙ බැල්මෙන්..... ලැජ්ජයිනෙ ...නෙහ් ...

නිසල් කීවේ හඬනගා සිනහසෙමිනි...

විශ්ව අතවූ ලිපිගොනුවෙන් ඔහුට දමා ගැසුවේ තරහෙන් නොව ඇතිවූ ලැජ්ජවටමය.

හරි හරි ...මම යන්නම්...උඹෙන් කුපාඩි කතා අහගන්නවට වඩා මම තනියම යන එක හොඳයි.....

විශ්ව අසුනේ හිස පසුපසට තබාගනිමින් ම පැවසීය. 

තමන් ගේ සිත තුළ ඇති චිත්ත වේගයන් නුසුදුසු ඒවා බව දැන දැනත් ඒවා තමන්හට පාලනය කරගත නොහැකි වීම ගැන විශ්ව කම්පා විය.අඩුම තරමේ තමන් මේ හැසිරෙන අන්දම වැරදි බව තමන් හට පිළිගැනීමට හැකි වීම ද එක් අන්දමකින් හොඳ තත්වයකි. තමා ගැන නිවැරදි දැක්මක් තමන් තුළ කෙසේ හෝ ඇතිවිය යුතු ය. 

පාරමී රත්මල්ගොඩ රෝගීන් සිව්දෙනෙකු පරීක්ෂා කොට අදාල උපදෙස් දී මොහොතක විවේකයක් ගත්තාය. අද දවසට අදාල රෝගීන් ප්‍රමාණය පහකට සීමා කරන්නට ඇය තීරණය කලේ ගතට දැනෙමින් තිබූ විඩාව හෙයිනි.

මැඩම් අන්තිම කෙනාව එවන්නද ...හෙදිය විමසුවේ පාරමී ගේ වෙහෙසකාරී වත දෙස මොහොතක් බලා සිටය.ඇයට මඳ සිනහවක් පෑ පාරමී හිසින් සන් කලේ එසේ කරන ලෙසය.

විවර වූ දොරින් කාමරය වෙත පැමිණියේ විශ්ව ජයසූරිය ය. පාරමී මඳ සිනහවක් පා ඔහු දෙස බලා උන්නාය.

ගුඩ් ඊව්නින් ඩොක්ටර් ....විශ්ව ඇයට සුබ පතා මොහොතක් උන්නේය...

ගුඩ් ඊව්නින්....ඉඳගන්න ....

පාරමී ඔහුගේ නම මතකයේ තිබුණද හිතාමතාම ඇමතීමෙන් වැලකී උන්නාය.

කොහොමද දැන් .....මං හිතන්නේ මේ සෙකන්ඩ් විසිට් එක.....

පාරමී ඔහුගේ ලිපිගොනුව අතට ගනිමින් ඇසුවාය...

ඔව් එන්න තිබුණ දවසට ඩොක්ටර් ගෙ අපොයින්මන්ට් කැන්සල් වෙලා තිබුණා...ඉතින් ඒකයි වුණේ.....

විශ්ව ඇය වෙත යොමුවූ නෙතින් පැවසුවේය. වෛද්‍යවරිය ඇත්තෙන්ම වෙහෙසකර පෙනුමකින් යුතු වන්නීය.ඇතැම් විට ඇය තවම නිසි සුවෙන් නොවන්නට ඇතැයි ඔහුට සිතුණි....

ඔව් මිස්ටර් ජයසූරිය....පොඩි අසනීප තත්වයක් නිසා ....එක්ස්ට්‍රීම්ලි සොරි...සෝ....කොහොමද ඉතින් ...

පාරමී ලිපි ගොනුව පසෙක තබා ඔහු වෙත නෙත් යොමු කළාය....

තමා පසුවන තත්වය පිළිබඳව විශ්ව පැහැදිලි කිරීමක් කලේ ඇත්තෙන්ම ඔහු දවනාවූ අතිශය කලකිරුණු ස්වභාවය හෙලිකරමිනි......

ඇත්තෙන්ම මට කවුන්සලින් අවශ්‍යයි ඩොක්ටර් ...මම නැත්නම් ඉස්සරහට මොනව කරයිද කියල මටම හිතාගන්න අමාරුයි ....

පාරමී රත්මල්ගොඩ මේ පුද්ගලයාගේ ගැටලුව මැනවින් සවන් දෙමින් අසා උන්නාය.ඇත්තෙන්ම විශ්ව ජයසූරිය යනු සැම අතින්ම අංග සම්පූර්ණ පුද්ගලයෙකි.පෙනුමෙන් අතිශය කඩවසම් වූද, ධනයෙන් ආඪ්‍ය වූද , බලයෙන් පූර්ණවූද අයෙකි.එහෙත් ඔහු සිටින්නේ තමාහට තමාපාලනය කරගත නොහැකි මට්ටමකය.

හුඟාක් නරක දේවල් ගොඩක් මැද්දෙ අපිට එක හොඳ කාරණයක් ඇති මිස්ටර් ජයසූරිය ඔක්කොම දේවල් හරිගස්සගන්න....ඔයාට හොඳ insight එකක් තියනව..ඔයාගෙ ගැටලුව ගැන...ඔයාට ඒකෙන් මිදෙන්න අවශ්‍යයි....ඉතින් ඒක තමා අපිට තියන හොඳම point එක මේකට...හොඳයි අපි ඔයාට හොඳ කවුන්සලර් කෙනෙක් හොයාගම්මු......ඔයා කැමති male කෙනෙක් එක්ක වැඩ කරන් යන්නද female කෙනෙක් එක්ක වැඩ කරන්නද....ඔයාට comfortable මොකක්ද......?" 

පාරමී හැකිතාක් දුරට මෘදු එහෙත් ස්ථාවර හඬක සිය කතාබහ පවත්වාගෙන යන්නට වූවාය....

" I am comfortable with you ....no need to find other professionals....මම මගේ කවුන්සලින් ට්‍රීට්මන්ට් එකට ඩොක්ටර් වම තෝරාගෙනයි මේ ආවෙ......" 

විශ්ව ගෙ හඬ නොසැලෙන සුලු විය.....

"මම ...? අනේ මිස්ටර් ජයසූරිය මම කවුන්සලින් part එක කරන්නෙ නැහැ නෙ....."

පාරමී පැවසූයේ අවංකවමය.ඇත්තෙන්ම උපරිම සුදුසුකම් සපුරා තිබුණද ඇය ඒ සම්බන්ධව වෙනම ක්‍රියාත්මක වීම් නොකලාය.

" ඩොක්ටර් නොකරනවා නම් .....its ok.....මේ වැඩේ අල්ලල දාමු....මට අවශ්‍ය නෑ...තව දුරටත් treatment .....thank you so much doctor for your advices....." 

විශ්ව අසුනෙන් නැගී උන්නේ ඉතාම වේගයෙන් කියමිනි.ඔහුගේ මුහුණේ ඉරියව් එහෙම පිටින් ම වෙනස්වී ගොස් තිබුණි..... පාරමී රත්මල්ගොඩ සිතුවිලි සිතාගත නොහැකිව ඔහු දෙස මොහොතක් බලා සිටියාය . මේ පුද්ගලයාගේ හැසිරීම් රටාව කෙතරම් ආවේගශීලී ද යන්න ඇය අවබෝධ කර ගනිමින් උන්නාය.

කලබල වෙන්න එපා මිස්ට ජයසූරිය පොඩ්ඩක් ඉඳ ගන්නකෝ.....

පාරමී දැඩි සේ ඉවසීමෙන් යුතුව ඔහු ඇමතුවාය. විශ්ව මොහොතක් ඒ දෙස බලා සිට ලොකු සුසුමක් හෙලා යළිත් ඉඳ ගත්තේය.

ඇත්තෙන්ම මම එහෙම කිව්වේ....හොස්පිට්ල් එකේ වැඩක් එක්ක මම counselling කොටස කරන්න යන්නේ නැති නිසයි...සාමාන්‍යයෙන් කවුන්සල කෙනෙක් උනාම....අපිට ළඟ ළඟ sessions වලින් patient එක්ක දිගටම කනෙක්ශන් එක තියාගන්න සිද්ධ වෙනවා...මිස්ටර් ජයසූරියට තේරෙනවා ඇතිනේ .....මම ඉන්නේ එහෙම කාලයක් ප්‍රයිවෙට් ප්‍රැක්ටිස් එකකට වෙන් කරගන්න....පුළුවන් මට්ටමකින් නෙමෙයි.....

විශ්ව මොහොතක් පාරමී දෙස බලා සිට නැගී උන්නේය.

මට තේරෙනවා ඩොක්ටර් ....කරන්න දෙයක් නැහැ....මගේ තීරණය මම වෙනස් කරන්නේ නෑ....තැන්ක් යූ...මම යන්නම්.....

විශ්ව එක්වනම කාමරයේ දොරින් පිටව යද්දී පාරමී කිසිවක් සිතගන්නට නොහැකිව උන් තැනම බලා උන්නාය. මේ පුද්ගලයා සම්බන්ධව දැහැමි සමගින් කතාකල යුතුද නැත්ද යන්න ඇය දෙපසට දෝලනය වෙමින් සිතුවාය.

යමෙකුගේ පෞද්ගලිකත්වය යනු වෛද්‍ය ආචාරධර්ම වලදී තරයේ රැකිය යුත්තකි. එහෙයින් තව දුරටත් මේ සම්බන්ධව මුනිවත රැකීම සුදුසු බව පාරමී තීරණය කළාය.


*********************************************************************************************** 

හමුවෙමු යලිත් 

මම 

විසිරි සිහින 


Monday, January 2, 2023

09 වෙනි කොටස - හදේ කොතැනක හෝ හිඳී ඔබ


08 වෙනි කොටසට මෙතනින් 08


09 වෙනි කොටස




අලුත් නිවහන තමන්ගේ උරුමකම් කියූ මහගෙදර සේම අලංකාර කරන්නට අම්මාත් මාලනීත් ඇප කැප වී වැඩ කළහ.

සැලකිය යුතු තරම් ඉඩකඩක් පැවැති නිවස පිටුපස නොබෝ දිනකින්ම අපූරු ගෙවත්තක් බවට පරිවර්තනය විය . අම්මගේ සහ මාලනීගේ කවදත් තිබූ අපූරු අත් ගුණය නිසාවෙන් ගොඩනැගූ සියලුම පාත්ති අපූරුවට දළු දමා නැගී එන්නට විය .

ගහකට කොළකට වුණත් මනුස්සයාගේ ආදරය සැලකිල්ල හොඳින් දැනෙනවා පුතේ ...අන්න ඒ නිසයි වගා කරන දෙයක් වුණත් උනත් අපි හිත කැමැත්තෙන් වගා කරන්න ඕනේ ...ගහකට පොළකට වුනත් කරුණාවෙන් ආදරෙන් කතා කලාම අපට ආපස්සට බෝග ලබා දෙනවා .....

අම්මා කවදත් උදෑසන නැගිට ගහකොළ අතරේ සැරිසරමින් ගස්කොළන් අතගාමින් කතාබහ කරන්නට පුරුදු වි උන්නාය .

අම්මගෙ මේ කතා අහලාම...අන්න සුනන්දාලත් එසේ හරි හරියට වවන්න පටන් අරගෙන... ඔක්කොටම එහා ...අපේ patients ල ටික ....තෙරපි යුනිට් එකත් එක්ක එකතු වෙලා .. එයාල horticulture therapy පටන් අරගෙන දැන් ටිකක් කල් ...ඇත්තෙන්ම ඒකෙන් ලෙඩ්ඩුන්ට හොඳම ප්‍රතිඵල තියෙනවා අම්මා.....මම ඉස්සර කියවපු artical එකකත් තිබුණා ඔය හුඟාක් ගස්කොළන් වල..මිනිසුන්ගේ මනසට ප්‍රතිකාර කරන්න පුළුවන් අපූරු හැකියාවන් තියෙනවා කියලා ....

පාරමී අම්මා සමග පැවසුවේ ....ඉරිදා දවසේ ඇයගේ කුඩා වගාබිම පුරා ඇවිද යමිනි ...ගෙවත්තේ කෙළවර වැට මායිමකින් වෙන්වී ඇති කුඹුරු යාය අසලට ගිය පාරමී ළයපුරා හුස්මක් ගෙන නැවුම් වායුව ආඝ්‍රාණය කළාය.

ඇත්තෙන්ම හිතන්න පුතේ බුදුහාමුදුරුවෝ වුණත් ජීවිතේ හැම වැදගත් දෙයක් ම සම්බන්ධ කරගෙන තිබුණේ ගහකට ...ඒකෙන් අදහස් වෙන්නේ ලෝකයම නිවපු මේ රටේ උත්තමයෙක් වුණත් ....ගහකොළ එක්ක මොන තරම් සමීපව කටයුතු කළා කියන එක නේද ...ඉතින් මනසින් රෝගී වෙන මිනිස්සුන්ට උනත් ...ගහකොළ කියන්නේ හොඳම ප්‍රතිකාරයක් තමයි....

අම්මා ඇයගේ අත වූ කුඩා පන් වට්ටියට කොළ අහුරක් නෙළා ගනිමින් පැවසුවාය ...මාලනී විසින් වැට මායිමට වන්නට වගා කොට ඇති මුකුණුවැන්න, ගොටුකොළ , සාරණ, කංකුන් ආදී පලාකොල රැස නිවැසියන්ගේ පමණක් නොව අහල පහල අසල්වාසීන්ගේ පවා ආහාර පිණිස අම්මාත් මාලනීත් නොමසුරුවම ලබාදුන්නෝය .

මේ තරම් සරුසාර පොළවක් තියාගෙන කඩවල් ගානේ ඇවිත් එළවළු ගන්න ...අපේ ගෙවල්වල අයටත් මේවා හොඳ පාඩම් ...නෝනා .... 

එක් වතාවක් අම්මා විසින් සුනන්දා අත තැබූ එළවළු කූඩය රැගෙන යන අතරේ ඇය පැවසුවාය.

උදෑසන ළා හිරු එළිය වැටී බැබළෙන ගස්කොලන් මත රැඳුණු පිණිබිඳු පාරමීගේ හිතට එක් කළේ අපූරුම ආශ්වාදයකි . ජීවිතය හැමවිටම තමා හට ලබා දෙන්නේ හොඳම දේ යැයි සිතීමට පාරමී උගත්තේ අම්මාගේ ඇසුරෙනි ...ජීවිතය පුරා කෙතරම් අභියෝගවලට මුහුණ දුන්නද අවසානයේ තමා හට ඉතිරි වූයේ හොඳම දේ පමණි .

දැන් යමු මාලනී බලාගෙන ඇති උදේට කෑමට එනකල්...අම්මා අතවූ පන්වට්ටියද ගෙන පෙරමුණ ගත්තාය. පලාකොලවලට අමතරව දිවා අහර පිණිස වගාවෙන් නෙලාගත් එළවළු වර්ග කිහිපයක් ද එහි විය. අම්මා සහ මාලනී නිර්මාංශ වූයේ වසර ගණනාවකට පෙරදීය. පාරමී ද මාංශමය අහරට එතරම් කැමැත්තක් නොදැක්වූ හෙයින් නිවසේ ආහරාපාන සියල්ල ගෙවත්තෙන්ම සැකසී තිබුණි.

උදෙන්ම දෙන්නම වත්ත ට ගියානෙ...මම කොළකැඳ ටික අරන් එන්නත් හදල ආයෙ එහෙම්ම උන්නා....ඉරිදා විතරනෙ අපේ චූටි මැණිකෙට වත්තපිටිය දකින්නවත් ලැබෙන්නෙ....

කිතුල් හකුරු කෑල්ලක් සමගින් කොළකැඳ කෝප්පය පාරමී අත තැබූ මාලනී පැවසුවේ සිනහසෙමිනි. 

ඔය ඔක්කොම කොල ජාති මෙහෙ වත්තෙන් තමයි .....කඩේ කොලකැඳ වගෙ නෙවේ....

මාලනීගේ ස්වාරයේ වූයේද ආඩම්බරයකි.

අපි ගිය සතියෙ ගමේ ගිය නිසයි මම මේ සතියෙ ඉම්මු කියලා කීවෙ අම්මා ....ඒකට කමක් නෑනේද ...හවස මට පොඩි වැඩ වගයක් තියනව...ලබන සුමානේ හොස්පිට්ල් එකේ වැඩසටහනක දේශන වගයක්...ඉතින් ගෙදර ගිහින් එන්න ගියා නම් ඕක කරගන්න වෙලාවක් නොවෙන නිසයි ඉම්මු කීවෙ.....

පාරමී අම්මාගේ උරහිසේ හිස රඳවමින් පැවසුවාය. 

ඒ ගෙදර මේ ගෙදර කියල දැන් වෙනසක් අපිට නෑ නේද මාලනී...දෙතනම අපි ඉන්නෙ සතුටින් නිදහසේනෙ .....

අම්මා මාලනී දෙස බලමින් ඇසුවාය. 

අනේ ඔව් ලොකු නෝනා...මේ ගෙදරත් අපිට එහේ ගෙදර වාගෙම හරි නිදහස්නෙ.....අහල පහල අයගෙන් උනත් කොහෙත්ම කරදරයක් නෑනෙ ඇත්තෙන්ම 

මාලනී හිස් කෝප්ප දෙකද රැගෙන මුලුතැන්ගේ වෙත නික්මුනාය.

මීළඟ සතිය බෙහෙවින් කාර්‍යබහුල සතියක් වන බව පරමී දැන උන්නේ රෝහලේ වැඩසටහන් මාලාව කියවූ පසුය. එම පුරා සතියක් පවතින වැඩ සටහන අතර ඇයගේ කාර්‍යභාරය ඉතාම වැදගත් එකක් විය. 

මානසික සෞඛ්‍ය සතිය වෙනුවෙන් සැලසුම් කල බොහෝ දේශන අතර ඇයගේ දේශන කිහිපයක් ද අඩංගු වී තිබුනි. 

පාරමී පොත්පත් සහ අන්තර්ජාලය ඇසුරින් බොහොමයක් කරුණු ගබඩා කොට ගත්තද ....සිය රටට සහ සංස්කෘතින්හට ගැලපෙන අන්දමට කරුණු ගොනුකරගන්නට සැලසුම් සකස් කළාය.

ළමා හා යොවුන් මානසික සෞඛ්‍ය සම්බන්ධයෙන් රට තුළ පැන නැගී තිබූ වර්තමාන බොහොමයක් දුක්බර ප්‍රවෘත්තීන් අතරේ වැඩි වැඩියෙන් කතා බහට ලක්වෙමින් තිබූ ළමා අපචාර සහ ඒ සම්බන්ධයෙන් සබැඳුණු මානසික සෞඛ්‍යය ගැන නැගී කෙටියෙන් ජනතාවගේ අවධානය යොමු විය යොමුවිය යුතු හෙයින් ඒ සම්බන්ධයෙන් දේශන මාලාවක් පැවැත්වීමට මානසික සෞඛ්‍ය සතිය පුරා පාරමී හට පැවරී තිබුණි .

එදිනෙදා පුවත්පත් සහ මාධ්‍ය තුළින් ලෝකයට නිරාවරණය වන බොහෝ දරුවන්ගේ ඛේදජනක කතාවන් තුළ පැවතුණේ කිසිම ආරක්ෂාවක් ආදරය සහ සැලකිල්ලත් මෙන්ම දරුවන්ට ලැබිය යුතු නිසි ලිංගික අධ්‍යාපනය ඔවුන්ට නොලැබී යාම නිසා සම්පූර්ණ අනාගතයම අඳුරු වන්නාවූ බොහොමයක් දුක්බර කතා ය .

එවන් ඛේදජනක අවස්ථාවන් වලට මුහුණ දුන් දරුවන් අප්‍රමාණව සිය වාට්ටු වල නේවාසිකව ප්‍රතිකාර ගන්නා හෙයින් පාරමීහට ඒ ඒ සිද්ධීන් අළලා ඇගේ දේශනා සැකසීම එතරම් අපහසු නොවීය 

ඉතා කුඩා වියේදී මෙන්ම නව යොවුන් වියේදීම අපචාරයන් හට ලක් වූ දරු දැරියන් දීර්ඝ කාලිනව පත්වෙන මානසික උපද්‍රවයන් සම්බන්ධයෙන් සෞඛ්‍ය ක්ෂේත්‍රයේ පමණක් නොව සියලුම ජනතාව දැනුවත් විය යුතු අන්දම ගැන අවධාරණය කරමින් පාරමී රත්මල්ගොඩ සිය දේශනය සැකසුවේ අඩුම තරමේ කිහිප දෙනෙක් හෝ එය අවබෝධ කරගෙන සමාජගත කරනු ඇතැයි යන බලාපොරොත්තුවෙනි .

බොහෝ වෙහෙස වුවද අවසානයේ තමන් තෘප්තිමත් විය හැකි දේශනයක් සැකසීමේ සතුට ඇතිව පාරමී දවසේ වැඩ හමාර කොට නින්දට ගියාය

                                                                           *** 


දැඩි සේ කාර්ය බහුල වූ මානසික සෞඛ්‍ය සතිය අවසානයේ දී පාරමී රත්මල්ගොඩ තෘප්තිමත් ව එහෙත් වෙහෙසින් යුතුව පසුවූවාය. යමක් සාර්ථකව අවසන් කිරීමේ සැනසීම සහ සතුට මිල කල නොහැකි අතර එය සඳහා ගතකල කාලය පිළිබඳව පාරමී තුළ තිබුණේ මහත් සතුටකි.

රෝහල් අධ්‍යක්ෂක වරයාගේ ඇරයුමෙන් ප්‍රධාන ආරාධිතයා ලෙස පැමිණි සෞඛ්‍ය නියෝජ්‍ය අමාත්‍යවරයා ද පාරමී ගේ වැඩ සටහන බෙහෙවින් ප්‍රසංශා කලේය.

එබඳු ප්‍රසංශා කවදත් හිතට නොගන්නා චරිතයක් වූ හෙයින් ඇයට ඒවායේ ලොකු වෙනසක් දැනුණේද නැත.

පාරමී සිය නිල නිවසේ එදින නැවතුණේ නිවෙසට යාමට පවා අධික ලෙස වෙහෙසක් දැනුණ හෙයිනි. සුනන්දා විසින් ගෙනවිත් දුන් රාත්‍රී ආහාරය උඩින් පල්ලෙන් ගිල දැමූවද පාරමීට අවැසිවූයේ ඉතා පහසු නින්දක් පමණි.දැනෙන හිස රදය වලක්වා ගන්නට වේදනා නාශක පෙති දෙකක් ගත් පාරමී ඇඳට වැටුණාය. 

රාත්‍රියේ ඇඟ සීතල කරමින් අධික උණ ගන්නා විට පාරමී දැඩි අපහසුවෙන් කෙඳිරිගෑවාය. එහෙත් නිල නිවස්නයේ කිසිවෙක් නොවන හෙයින් සිය ගතට දැනෙන වේදනාව කෙසේ හෝ දරාගත යුතුව තිබුණි. පාරමී යළිත් වේලාව බලා පැනඩෝල් පෙති දෙකක් ගිල දැමුවාය. 

උදෑසන සුනන්දා හට ඇමතුමක් යවා ගෙන්වා ගත් පාරමී වහා වාට්ටුව වෙත ගියේ අපහසුතාවය මැඩගෙනය.

මැඩම් ලේ එකක් බලවමු...මේ දවස් වල තත්වෙ දන්නවනෙ.....ප්‍රධාන හෙද නිලධාරිනිය පැවසූ විට පාරමී නිහඬවම එයට කැමතිවූවාය. සුනන්දා විසින් වහ වහා මුලුතැන්ගේ වෙතින් ගෙන ආ කැඳ කෝප්පය පානය කල පාරමී යලි නිලනිවස්නය වෙත ආවේ ඇඳට වැටෙන්නට ගත දැඩිව ඉල්ලන හෙයිනි.

ජංගමය හෙමින් හඬතලන රිද්මයට අවදිවූ පාරමී රත්මල්ගොඩ ආයාසයෙන් ඇස් හැර වේලාව බැලුවාය. වේලාව හවස හතර පසුවී විනාඩි පහලොවක් පමණය.තමා එකදිගට පැය හතරක් පහක් නිදාගෙන ඇත. ජංගමයේ එහා කෙළවර ඉන්නේ අම්මාය.

මැණික සුනන්දා කිව්ව මගෙ පුතාට උණ කියල. ඇයි ගෙදර ආවෙ නැත්තෙ දරුවො

අම්මා ගේ හඬ කලබල කාරීය. 

අම්මා හොස්පිට්ල් එකේ ඉන්න එකනෙ වැඩියෙන්ම හොඳ අසනීපයකට.මම බ්ලඩ් එකක් යැව්වා .රිපෝට්ස් ආවම බලල ම එන්නම් ගෙදර 

පාරමී අම්මාගෙන් සමුගත්තේ යළි වැතිර ගන්නට වූ අවශ්‍යතාවය හෙයිනි.සුනන්දා යළි පැමිණියේ සුප් කෝප්පයක් රැගෙනය.

සුනන්දා ටත් මං නිසා කරදරේ .....

පාරමී කෘතඥ හඬින් පැවසුවාය.

මොන කරදරයක් ද මැඩම්...අද මම නයිට් ...මං මැඩම් ව බලන්න සැරින් සැරේට එන්නම්....රෙස්ට් එකක් ගන්න දැන්...

සුනන්දා ගේ හඬ මව් ගුණය සපිරි එකකි.

සුනන්දා පොඩ්ඩක් ලැබ් එකට කෝල් කරනවද.....රිපෝට් එක රෙඩිද බලන්නකො

සුනන්දා වහ වහා දුරකථනය වෙත දිවගියේ රසායනාගාරයට ඇමතුමක් ලබා ගැනීමටය . වාර්තාව සූදානම් වී ඇති බැවින් ඇය පාරමිගෙන් සමුගෙන වහා රසායනාගාරය වෙත දිවගියාය.

අනුමාන කළ පරිදිම පරිදිම පාරමීට වැලඳී තිබුණේ ඩෙංගු රෝගයයි . අදාළ ප්‍රතිකාර සමගින් පාරමීට අවශ්‍ය වූයේ විවේකය හෙයින් සිය නිවසට නොයා නිල නිවසේම විවේක ගැනීමට ඒ තීරණය කළාය .අම්මා සහ මාලනී නිවස වසා දමා නිල නිවස වෙත ආවේ ඉන් පසු දින ම ය .එතරම් දැඩි අපහසු තාවයක් නොතිබුණද ගත වූ දින කිහිපයේ දැඩි ලෙස වෙහෙසට පත් වූ හෙයින් පාරමීට ඇඳ විවේකය ගැනීමට නිර්දේශ විය .

මේ අතර තුරේදී පාරමීගේ පෞද්ගලික චැනලින් සේවාව ද සති දෙකකට අත්හිටුවන ලදී .

                                                                      *** 

උඹ දැන් ආපහු අර ඩොක්ටර් ව හමුවෙන්න යන්නේ නැද්ද ....

නිසල් විශ්වගෙන් ඇසුවේ සුපුරුදු පරිදි සෙනසුරාදා හමු වූ විට ය .විශ්ව මිතුරා දෙස බැලුවේ එතරම් උද්යෝගිමත් බැල්මකින් නම් නොවේ .

මට කිසි දේකට හිතක් නෑෑ බං ...ඔක්කොම එපාවෙලා තියෙන්නේ .....ඩොක්ටර් උනත් දුන්නේ සාමාන්‍ය බෙහෙත් ටිකක් නේ .එයා වුණත් කිව්වේ councelling යන්න කියලා නේ ....

විශ්ව අත වූ බීර වීදුරුව පසෙක තබමින් පැවසුවේය . 

ඉතින් counselling වලටත් එයාවම හම්බෙන්නෙ යමංකො ...ඇයි දැක්කේ නැති එයාගේ prescription කාඩ් එක ...අම්මෝ බං එච්චර qualifications ....මේ විශ්ව කියන දේ අහලා පිස්සු නටන් නැතුව ආපහු appointment එකක් දාපන් ....

නිසල් පැවසූයේ තරමක් කේන්තියෙනි . මේ තරම් නොසැලකිලිමත් අන්දමින් ගතකරන සිය මිතුරා සම්බන්ධව තරමක් තදින් සිටිය යුතු බව නිසල් වටහා ගත්තේ පසුගිය දින වෛද්‍යවරිය හමුවීමට ගොස් පැමිණි පසු ඔහු දැක් වූ යම් තරමක නම්‍යශීලී ප්‍රතිචාරය හේතුවෙනි .

එහෙනම් ලබන සතියට දාපන් appointment එකක්...උඹෙන් බේරෙන්නත් බෑනෙ....

අවසානයේ විශ්ව පැවසූවේ නිසල් වෙතින් සමුගෙන ඒමට පෙරය.විශ්වගේ යටි සිතෙහි වෛද්‍ය පාරමී රත්මල්ගොඩ හමුවීමේ කැමැත්තක් තිබීයයිද ඔහුට විටෙක සිතුණි.ඇය සිය ගැටලු හමුවේ දැක්වූ පරිණත හැසිරීම සහ ඇහුම්කන් දීම තුළ ඒ විශ්වාසය ගොඩ නැගෙමින් පැවතුණි.

මාර වැඩේනෙ ලොක්කා....දොස්තර මැඩම් සති දෙකතුනකට චැනලින් අත් හිටවල නෙ. එතන උන් දන්නෙත් නෑ හේතුව....අපේම වෙලාව තමා...

පසුදා නිසල්ගේ හඬ ජංගමය ඔස්සේ ඇදී එනවිට විශ්වට දැනුණේ කුමක් හෝ අතහැරීගියාක් බඳු හැඟීමකි.

ඒකත් එහෙමද....මාර දොස්තරලා නෙ බං...ලෙඩ්ඩු අමාරුවේ ඉතින් ....

විශ්ව සිය නොපහන් බව යටපත් කරනොගනිමින් ම පැවසුවේය.

එහෙම කියන්න එපා බං...කවුද දන්නෙ....දොස්තරලා කියල මොකෝ වෙනත් ජීවි කොට්ටාසයක් නෙවේනෙ ඉතින් ...ඒත් මනුස්සයො..කවුද දන්නෙ ලෙඩක් දුකක් කරදරයක් ද කියල....අපි නෙක්ස්ට් වීක් ආයෙ බලමුකො....

නිසල් විශ්වගේ නොපහන් හඬ අසමින්ම පැවසීය.

නිසල්ගේ ඇමතුම විසන්ධි වූ පසු විශ්ව සිය ඇමතුම් දිනපොතේ පිටුවක් පෙරලා එහි වූ පාරමී රත්මල්ගොඩ ගේ ජංගම දුරකතන අංකය දෙස මොහොතක් බලා උන්නේ හදිසියේ ආ සිතුවිල්ලකිනි.එම අංකය අංකනය කල ඔහු ජංගමය සවනත තබා ගත්තේ හිතුවක්කාර සිතුවිල්ලකිනි.

හෙලෝ.....

එහා පසින් ජංගමය ට සම්බන්ධ වූයේ වියපත් ගැහැණු හඬකි. විශ්ව යලිත් දිනපොතෙහි අංකය පිරික්සා බැලීය.එයමය.

හෙලෝ....මට ඩොක්ටර් පාරමී රත්මල්ගොඩ ට කතාකරන්නයි ඕන වුනේ...මේ ඩොක්ටර් ගේ නම්බර් එකනේද.....

විශ්ව මඳක් හඬ වෙනස්කොටගනිමින් ඇසීය.

"ඔව් ..මේ දුවගෙ නම්බර් එක තමයි ....ඒත් එයාට ඩෙංගු හැදිලා ටිකක් අසනීපෙන්....මම දුව නැගිට්ටම කියන්නම්...මේ මහත්මයා කවුද.....?"

ඉතා කාරුණිකව ඇමතුමේ ඒ රැඳී උන්නේ වෛද්‍යවරියගේ මව බව විශ්ව ට වැටහුණේ එවිටය.

"ආ...නෑ නෑ ..මම ඩොක්ටර් ගෙන් බෙහෙත් ගන්න කෙනෙක්...චැනලින් එකෙන් ඩොක්ටර් සති දෙකක් එන්නෙ නෑ කියු නිසයි ගත්තෙ . බොහොම ස්තුතියි ....මම තියන්නම්....

විශ්ව වහා ජංගමය විසන්ධි කලේය.

නිසල් හා එක්ව දොස් නැගුවද ඇය රෝගී බව අසා සිතට නැගුණේ දුකක් බඳු හැඟීමක් දැයි විශ්ව මොහොතක ට සිතුවේය. පාරමී රත්මල්ගොඩ යනු සිය මනෝ වෛද්‍ය වරිය මිස ඉන් ඔබ්බට විශේෂයක් දැන්වූ අයෙක් නොවේ.

එහෙත් ඇය ගේ මුහුණුවර තමාට කොහේදී හෝ හමුව ඇතැයි විශ්ව දින කිහිපයක්ම කල්පනා කරමින් සිතුවේය.නමුත් ඔහුට ඇය පෙර දිනක දැහැමිගේ නිවසේදී හමුවූ බවක් සිහියට නොආවේය.

ජීවිතය විවිධාකාර පුද්ගලයන් අතරමගදී මුණ ගස්සන්නේ හේතු ඇතිව බව බොහෝ විට අප නොදනිමු .නමුත් මේ සියලුම හමුවීම් සහ වෙන්වීම් වල දෛවයේ කොහේ හෝ ලියැවුණු කතන්දරයක් ඇත . සොබාදහමේ නීති රීතීන් අභිබවා අප යන්නට තැත් දරන මොහොතේදී එම නීති රීතීන් අපිට එරෙහිව නැගී සිටී . 

තමා පසුවෙන තදබල ආතතිමය තත්වය යළිදු පාරමී රත්මල්ගොඩ වෛද්‍යවරිය හමුවී සත්‍ය වශයෙන් ප්‍රකාශ කිරීමට විශ්ව තීරණය කොට ගත්තේ බොහෝ දුරට සිතා බලාය .

ජීවිතේ අවුරුදු බොහෝ ගණනක් තිස්සේ තමා වෙත නොවූ මෙම නම්‍යශීලී බව මේ අන්දමින් ඇතිවීම විටෙක ඔහුට ද සිතා ගත නොහැකි තරම් පුදුමාකාර හැඟීමක් විය .

********************************************************************************************* 

හමුවෙමු යලිත් 

මම 

විසිරි සිහින