15 - හදේ කොතැනක හෝ හිඳී ඔබ

 

15  වෙනි කොටස 

14 වෙනි කොටසට මෙතනින් 

විශ්ව ආපසු නිවසට පැමිණියේ රාත්‍රී දොලහ පමණ වන විටය.හවස දෙක තුන වූවෙලේ පටන් පාරමීගේ මවගේ මරණය සම්බන්ධ කටයුතු වල යෙදුණ හෙයින් ඔහුට දැඩි වෙහෙසක් දැනුනි.එහෙත් සිත යට කුමක් හෝ හැඟීමක් පිනුම් ගසන්නා සේ දැනේ .....

මූනෙ තියන මනමාල පාට

නිසල් එන අතරමගදී සිනහසෙමින් පැවසුවේය. මෙතුවක් වේලා විහිලුවක් හෝ කරගන්නට නොහැකි වුවද සිය මිතුරාගේ සිතට ඇතිව ඇති වෙනස ගැන ඔහුට සතුටක් දැනුණි.

යකෝ මලගෙයක් අස්සෙ කියන කතාද ඔය ? 

විශ්ව නිසල් වෙත අත මිට මොලවා පහරක් ගසන්නට තැත් දරමින් පැවසීය.

මලගේ නිසා තමයි මස්සිනා මෙච්චර වෙලා හරි කටවහන් උන්නෙ දැන් ඉතින් උඹයි මායි විතරනෙ .කාට ඇහෙනවද මොනව කීවම.

නිසල් හිනැහුණේ එසේ කියමිනි.

මොනව වුනත් පව් බං. අම්මා එක්ක ලොකු බොන්ඩ් එකක් ඩොක්ටර් ගෙ තිබිල තියනව. ඔය උන්න ටිකට මට ඒක තේරුන.අපේ අම්මල අපෙන් ඈත්වෙන්නෙ ඒ අයගෙ චර්‍යාවල හැටියට බං. ඒත් ඩොක්ටර් ගෙ අම්මා ගැන අර දැහැමි නංගී ගෙ අම්මා කිව්ව දේවල් වලින් මට උනත් අනේ මටත් එහෙම අම්මා කෙනෙක් උන්න නම් කියල හිතුණ.

ඒක නම් ඇත්ත බං.අපේ ළඟම ඉන්න අපේමයි කියන මිනිස්සු කිසිම දාක අපිව තේරුම් ගත්තෙ නෑ.ඒ වගේ වෙලාවට තමා පාරමීගේ අම්මා වගේ අයගෙ අගය අපිට වුණත් දැනෙන්නෙ.

නිසල්ද ඒ කතාව අනුමත කරමින් පැවසීය.

මොක වුණත් බං දොස්තර නෝනා එක්ක උඹේ තියන ලෙඩා දොස්තර සම්බන්ධෙ නම් වෙනස් අතකට හැරෙයි වගෙ කියල මට පේන්න ගන්නවා

නිසල් කතාව අන් අතකට හරවමින් පැවසීය.

උඹට පිස්සුද ? ඕවා හිතන්නවත් එපා .අපි දෙන්නව කුදලන් ගිහින් අංගොඩම ඇඩ්මිට් කරාවි.

විශ්ව සැහැල්ලු ස්වරයෙන් හිනැහෙමින් කිව්වද ඔහුගේ හිතට දැනුනේද පාරමී ඔහුගේ බසට අවනතව ආහාර ගන්නට ගිය මොහොතය.හිතුවක්කාරකමට වඩා ඇයට වූ අසරණ භාවය හෙයින් කෑම ප්‍රතික්ෂේප කළද තමාගේ ඒ වදන් හමුවේ ඇය නම්‍යශීලී වූ අන්දම ඔහුට ගෙන ආවේද සියුම් සතුටකි.

              

පාරමී නැවත රෝහල වෙත පැමිණියේ මාලනී ද සමගිනි.නිල නිවසේ සතියේ දින කිහිපය සිටීම වඩා උචිත යැයි ඇය මුලින් තීරණය කළාය.

" එක පාරටම ගෙවල් මෙහෙම වහල දාල යන්න හොඳද චූටි මැනිකෙ, අඩුගානෙ හත්දවසෙ දානෙ වත් දෙනකල් ?" මාලනී ඇසුවේ එන අතරමගදීය .

මට මාලනි ඇන්ටිව ගෙදර තනියම දාල එන්න බෑනෙ.අපි එහෙනම් හවස ආපහු යං මේ ටිකේ. පස්සෙ සතියෙ දවස් ටික මෙහෙ ඉඳල සති අන්තෙට යං එහෙයි මහගෙදරයි.

පාරමී අවසානයේ එසේ තීරණය කළාය.

වාට්ටුවට ඒමට පෙර රෝහල් අධ්‍යක්ෂක වරයා හමුවූ පාරමී සිදුවූ කාරනා ඔහුට පැහැදිලි කලේය.

බොහොම කණගාටුයි ඩොක්ටර් . ඒත් අපි ජීවිතේ ගැන කාටත් වඩා හොඳින් දන්න අයනෙ. Be strong . මොකුත් අවශ්‍ය දෙයක් තියේ නම් කියන්න.

රෝහල් අධ්‍යක්ෂක වරයා පැවසුවේය . පාරමී ඔහුට ස්තුති කොට වාට්ටුව වෙත පැමිණියේ මාලනී නිල නිවසේ නවත්වාය. 

අනේ මැඩම්, ඇයි නිකමටවත් අපිට නොකිව්වෙ .ලොකු නෝන මටත් කොච්චර නම් හොඳට සලකපු කෙනෙක්ද.?අවසන් ගෞරවයවත් දක්වන්න එන්න උනෙ නෑනෙ අපිට 

සුනන්දා දෑසේ කඳුලු පුරවාගෙන පැවසුවාය.සති දෙකතුනකට වරක් පාරමීගේ නිවසට ඇවිත් යන සුනන්දා අම්මා සමග බොහෝ වේලා කතාබහේ යෙදෙන්නට කැමති වූවාය. ආපසු යනවිට අම්මා වැවූ එළවළු කූඩයක්ම ඇයට තෑගි ලැබේ. ඔවුන් අතරේ ගොඩනැගී තිබුණේද අපූරු මිත්‍රත්වයකි.

අම්මගෙ කැමැත්ත තිබුණෙ ෆැකල්ටි එකට එයාව දෙන්නනෙ සුනන්දා.ඉතින් අපි ඒ විදියට ඒ දේවල් කලා. මොනව කරන්නද තේරෙන්නෙ නෑ සුනන්දා.මගෙ ජීවිතේ ම හිස් වුණා වගෙ.

පාරමී අසුනට බරවෙමින් පැවසුවාය.සේවයට පැමිණි පසු කෙතෙක් සිත එකඟ කරගන්නට තැත් කළද...අම්මාගේ මතකය ඉල්පි ඉල්පී එන්නේ දියේ ගිල්වූ රබර් බෝලයක් උඩ එන්නා පරිද්දෙනි.අම්මා නැතැයි සිතට තවමත් දැනෙන්නේ නැති තරම් ය.

ජීවිතය යනු දීර්ඝ වන්දනාවකි.චාරිකාවකි. ඒ ගමන ආරම්භයේ සිටම අප හා එක්වන්නන් බොහෝය.එහෙත් ඒ හැමටම අපෙන් මිදෙන්නට දිනක් එයි.සෙසු දුර අප කෙසේ හෝ තනි ව යායුතුය. ලෝ දහම එයයි.

                                                                    *** 

දිනගණනාවකට පසු වාට්ටුවට ආ බැවින් පාරමී මොහොතකට සියල්ල මනසින් බැහැර කොට රෝගීන් පරික්ෂාවේ යෙදුණාය. ඇතැම් රෝගීන් අලුතින් ඇතුල් වී ඇත.තමා නොසිටි දින කීපයේ රාජකාරි ආවරණය කල වෛද්‍යවරයා වෙත බලතල පැවරීම නිසා වාට්ටුවේ කටයුතු ගැටලුවක් නොමැතිව සිදුව ඇත.

ඩොක්ටර් රහල් , ඩොක්ටර් චාපා පොඩ්ඩකට ස්ටාෆ් රූම් එකට එන්න.

පාරමී සිය කාර්‍යාල කාමරය වෙත පිවිසියේ සිය වෛද්‍ය දෙපළට කැඳවමිනි .

පහුගිය දවස් කීපයේම මට වාට්ටුව ගැන ලොකු අවධානයක් දෙන්න බැරි වුණා.ඉතින් බ්‍රීෆින් එකක් දෙන්නකො.ඔයාල දෙන්නගෙ sides ගැන.ඔක්කොම ඕනනෑ.ප්ලෑන් චේන්ජ් වුන ඒවායි අලුත් ඇඩ්මිෂන් ටිකයි පොඩ්ඩක් කියන්නකො.

පාරමී අසුනට බරවෙමින් පැවසුවාය.

වෛද්‍යවරුන් දෙදෙනා සිය රෝගීන්ගේ එක් එක් ගැටලු සහ ප්‍රතිකාරාත්මක තත්වයන් ගැන වෙන වෙනම සඳහන් කලහ.වෛද්‍ය චාපා නික්ම ගිය පසු රහල් මඳක් රැඳුණේ ප්‍රසංගි ගැන කතාකරන්නට බව පාරමී වටහාගත්තාය.

"කොහොමද රහල්, ප්‍රසංගි ගෙ තත්වය දැන් ?" 

පාරමී ඇසුවේ පැහැපත් මුහුණැතිව ඉන්නා තරුණ වෛද්‍යවරයා ගෙනි.

"මැඩම් ප්‍රසංගි මාව අඳුනගත්තා. හැබැයි මොකුත් කලබලයක් කලෙ නෑ."රහල් පැවසුවේ සතුටිනි.

" මම එයාව assessment එකකට ගත්තා ගිය සතියෙ. ඒ වෙලාවේ එයා ඔයාට කොහොමද රහල් කියල මගෙන් ඇහුවා" රහල්ගේ මුහුණේ වූයේ මැඩගන්නට අපහසුතරමේ ප්‍රීතියක් බව පාරමී ට වැටහුණි.

"එතන ඒ වෙලාවේ වෙන කවුද උන්නෙ? "පාරමී ඇසුවාය. 

"ස්ටාෆ් අය උන්නෙ නෑ මැඩම් කවුරුවත් .හැබැයි මෙඩිකල් ස්ටුඩන්ට්ස්ලා කීපදෙනෙක් උන්නා.එයාලට ඒක වෙනසක් උනේනෑ" රහල් පැවසුවේ පාරමී වෙත යොමුවූ නෙතින්මය.

"හොඳයි රහල් ඒක හොඳයි. කිසිම වෙලාවක female patient කෙනෙක්ගෙ assessment එකක් කරනකොට patient විතරක් තනිවම ගන්න එපා .මොකද ethics කියලා දෙයක් තියෙනවානෙ.ඔයා දන්නවනේ මේ පේෂන්ට්ස්ලාගේ මානසික තත්ත්වය කියන්නේ අපේ සාමාන්‍ය තත්ත්වයට නොවෙයි .ඒ අය සමහරක් වෙලාවට අපි හිතන්නෙවත් නැති චෝදනාවන් කරන්න ඉඩ තියෙනවා .ඔයා දන්නවනේ ඔය abuses වගේ දේවල් . ඒ වගේ complaints එන්න පුළුවන් නොහිතන විදියට.ඒ නිසා හැමතිස්සෙම පේෂන්ට් කෙනෙක් බලනකොට supportive staff නැත්තං student කෙනෙක් හරි ලඟින් තියා ගන්ඩ ඕනේ .

පාරමී රහල්ට කියාදුන්නේ රීතිමය කාරණයකි . මානසික ගැටලුවලින් පෙලෙනන බොහෝ රෝගීන් සිටින්නේ පියවි මානසිකත්වයකින් නොවේ.එහෙයින් ඇතැම් විට ඔවුන් වෙතින් සදොස් කාරණා ප්‍රකාශ වන්නට පුළුවන.විශේෂයෙන්ම අපචාරී කාරණා සම්බන්ධව බොහෝ පැමිණිලි ඉදිරිපත් වන්නේ මේ බඳු පූර්ව ආරක්ෂණ ක්‍රම නොගත් විට ය.

සිය ප්‍රධාන වෛද්‍යවරියගේ එම උපදෙස් දීම රහල් ඉත සිතින්ම පිළිගත්තේය .නවක වෛද්‍යවරයෙකු හට මෙම උපදෙස් මාලාවන් ඉතා වැදගත් වන බව ඔහු දැන උන්නේය .

හරි ඉතින් ඊට පස්සේ මොකද වුණේ

පාරමී ඇසුවාය.

ඊට පස්සේ ලොකු දෙයක් නම් කිව්වේ නැහැ මැඩම් . මම පොඩි පොඩි කාරණා එයා ගෙන් ඇහුවා. තාම එයාගෙ memory ඉෂූ එක තියෙනවා. ටිකෙන් ටික එයාට මතක් වෙනවා වගේ පේනවා.

හොඳයි ඔයා වෝඩ් එකට යන්න .අපි සති දෙකකට සැරයක් තෝරගත්තු patient ලා කිහිප දෙනෙක්ගේ treatment ප්ලෑන් එක වෙනස් කරන්ඩ ඕනේ.චාපා එක්කඑකතුවෙලා ඒක සූදානම් කරගන්නකො.

පාරමී ඔහුගෙන් සමුගෙන නිලනිවස වෙත පියමැන්නාය.මෙතුවක් කල් දිවා අහර ගන්නට තිදෙනෙක් උන් ලෝකයේ දැන් ඉන්නේ දෙදෙනෙකි. අම්මා නැති අඩුව හුදෙකලා වෙන හැම මොතකදීම ඕනෑවටත් වඩා සිත පාරයි.මාලනී කුඩා මුලුතැන්ගේ පුටුවක හිඳගෙන බලාඋන්නාය.

බඩට බත් කටක් වැටෙන්නෙ කොහොමද චූටි මැණිකෙ, ලොකු මැණිකෙ මතක් වෙනකොට. කන්න ගන්න කලින් මාලනි ඔයාත් මෙහෙම්ම කාල ඉන්නකො කියනව මට ඇහෙනවා ඇහෙනවා වගේ 

කඳුළු පිරි දෑසින් සුසුම් හෙළමින් මාලනි පැවසුවාය . රෝගීන් අතර රෝහලේ දී කෙතරම් කාර්යබහුල වුවද නිවසට පැමිණි පසු අම්මා පිළිබඳ මතකය හිත තදින් පාරවයි. පාරමී ගත් බත් පත කටවල් දෙක තුනක් පමණක් කා පසෙකට කර කාමරයට වැදුණය.

                                                                      *** 

දින දෙක තුනක් ගතවී ගිය ද පාරමී රත්මල්ගොඩ ගොඩ සම්බන්ධව ඉන්පසු කිසිදු තොරතුරක් ලබා ගැනීමට විශ්වට හැකිවූයේ නැත . දැහැමි අමතා ඇයගේ තතු විමසන්නට සිතුවද එයටද සිත මැලි වෙයි . ඇයගේ දුරකතන අංකය කිහිප වතාවක් අංකනය කළ ද ඇමතුමක් ගන්නටවත් හිත පසුබට වෙයි.

මොකෝ උඹ නිකං ගලේ පහරපු බළලා වගේ එහෙට මෙහෙට ඇඹරෙන්නේ 

නිසල් සිය මිතුරා ගේ හැසිරීම බොහෝ වේලාවක් නිරීක්ෂණය කළේය .ඔහු විටෙක කාර්යාල කාමරයේ එහෙට මෙහෙට ඇවිදිමින් සිටී .තවත් විටෙක ජංගම දුරකතනය අතට ගෙන නැවත එය ආපසු තබයි .හිසකේ අතරට ඇඟිලිතුඩු යවා අදිමින් කල්පනාවේ යෙදෙමින් සිටී .

නෑ නෑ එහෙම මොකුත් නෑ .

විශ්ව කලබලයෙන් පිළිතුරු දුන්නේය .

මොකද නැත්තේ දැන් මම විනාඩි හතලිස්පහක් තිස්සේ උඹේ දිහා බලාගෙන ඉන්නේ. උඹ කහබිලිය ගාලක් දිගේ ඇවිදිනවා වගේ පුදුම විදියට නලියනවා . කියපන් මොකද්ද කෙරෙන්න ඕන 

නිසල් පැවසුවේ සිය මිතුරාගේ ආසනයට යාබද ආසනයෙන් හිඳ ගනිමිනි. 

තමා පිළිබඳ සියලුම දේ දන්නා , එමෙන්ම සියලු කාරණාවල දී තමා හා අත්වැල් බැඳ ගන්නා සිය මිතුරාට සඟවන්නට තමාගේ ජීවිතයේ කිසිම දෙයක් නොමැති බව විශ්ව දැන උන්නේය .

එදායින් පස්සේ මොකක් උනාද කියලවත් දන්නේ නැහැනේ බං ..කෝල් එකක් දෙන්නත් හිතෙනවා .ඒත් ආයෙත් කරදරයක් වෙයිද කියලා හිතෙනවා. 

විශ්ව පැවසුවේ සිය මිතුරා දෙස ආයාචනාත්මක දෑසින් බලමිනි .

අපිට ආයෙ චැනලින් කතාව කියන්න බෑනෙ බං මේ වෙලාවේ .මොකද තාම හත්දවසේ දානේ වත් ....ඒයි දැනුයි මතක් වුනේ හෙට නේද හත් දවස වෙන්නේ ...යමුද අපි ඒ පැත්තෙ ?

නිසල් කතාව මැද්දේ අසුරු සැණක් ගසමින් පැවසීය 

එහෙම යන්න පුලුවන්ද බං .එන්න කියන්නේ වත් නැතුව .බණකට දානෙකට එහෙම ආවට ගියාට යන්න බැහැනේ .

විශ්ව පැවසුවේ කල්පනා බරිතව ය .

මේ අතර පාරමි සේවය නිමවී මාලනී සමඟ නිවසට පැමිණියේ පසු දින යෙදෙන හත් දවසේ බණ සහ දානයට අවශ්‍ය දේවල් ද රැගෙනය .

චූටි මැණිකේ මං මේ අහන්නයි උන්නේ. අර එදා උදව් කර මහත්තුරු දෙන්නට බණට දානයට එන්න කිව්වා නම් නේද හොඳ ..අපිට ඒ වෙලාවේ වෙන කවුරුත් හිටියේ නෑනේ චූටි මැණිකේ . අනික කියන්න කියලත් අපි කාට කියන්නද දැහැමි නෝනලයි ගෙදර අයයි අපියි විතරයි නේ .

තමන්හට අමතකව යන්නට විය දෙයක් මාලනී විසින් සිහිපත් කරදීම ගැන පාරමී ස්තුති බැල්මෙන් ඇය දෙස බලා උන්නාය.

මාලනී ඇන්ටි කියලනකල් මට ඒක මතක් වුණෙත් නැහැ. අඩු තරමින් ඊට පස්සේ මට කෝල් එකක් දීලා ස්තුතියි කියන්නවත් බැරි වුණා. ඒ මිනිස්සු හිතන්න ඇති මං මහා ගුණමකුයි කියලා.මම කෝල් එකක් දෙන්නම් .

පාරමී නිවසට විත් වැරන්ඩාවේ අසුනක හිඳ ගත්තාය .නිසල්ගේත් විශ්වගේත් දුරකථන අංක දෙකම තමා සතුව ඇතත් කාට අමතන්න දැයි ඇය මොහොතක් කල්පනා කළාය.අවසානේ ඇය විශ්වගේ අංකය සිය ජංගමයේ සනිටුහන් කළාය. 

කාර්යාලයෙන් පිටත්ව යන්නට මොහොතකට සිය ජංගමය නාද වනු දැනී විශ්ව මොහොතක් නතර වූයේ නිසල්ටද අතින් නවතින ලෙස සන් කරමිනි .

ජංගමයේ මුහුණතේ සනිටුහන් වන ඒ නම දුටුවිට විශ්වගේ මුහුණ අපූරු සිනහවකින් එළිය විය .නිසල් සිය මිතුරාගේ මුහුණේ ඇතිවූ ක්ෂනික ආලෝකය දැක වහා එතැනට ආවේය .ජංගමයේ මුහුණත ඔහුට පෙන්වමින්ම විශ්ව ඇමතුමට සම්බන්ධ වූයේය 

හෙලෝ මිස්ටර් ජයසූරිය, මම මේ කතා කරන්නේ පාරමී ...පාරමී රත්මල්ගොඩ.මේ වෙලාවේ කතා කරන්න පුලුවන්ද දන්නේ නැහැ

හෙලෝ .ආ .ඔව් doctor කියන්න .

I am really sorry mr. Jayasuriya.

මම ආපහු වැඩට ගිය නිසා හුඟාක් බිසි වුණා .ඔයාලට ආපහු කතා කරන්නවත් මට පුළුවන්කමක් වුණේ නැහැ.

පාරමීගේ හඬෙහි වූ පසු තැවිල්ල විශ්ව ක්ෂණයකින්ම වටහා ගත්තේය.

ඒකට කමක් නැහැ ...අපි දන්නව ඩොක්ටර් බිසී කියලා .ඒකයි කෝල් එකක් නොදුන්නේ අපිත්.. 

විශ්ව ආයාසයෙන් වචන එකතු කර ගත්තේය 

මම මේ කතා කලේ පොඩි ආරාධනයක් කරන්නත් එක්කයි .හෙටට අම්මා නැතිවෙලා සතියක් වෙනවා .ඉතින් හෙට රෑ අපේ ගෙදර බණයි ඊළඟ දවසේ උදේ දානයයි දෙකම තියෙනවා .අපිට මේ වෙලාවේ ආරාධනා කරන්න කවුරුත් නැහැ ...ඔය දෙන්න අපිත් එක්ක මේ අමාරු වෙලාවෙ දිගටම හිටපු දෙන්නා ඒ නිසා ..පුළුවන්නම් බණටයි දානයටයි පොඩ්ඩක් ඇවිල්ලා යන්න කියලා ආරාධනා කරන්නයි මම ගත්තේ. 

පාරමීගේ ඇමතුම ගතවෙන තත්පරයක් තත්පරයක් පාසා විශ්වගේ මුහුණේ ඇතිවන සිනහව නිසල් බලා උන්නේ බොහෝ සතුටිනි.සිය මිතුරාගේ ජීවිතයේ පැහැදිලි වෙනස් කමක් ඇති වෙන බව ඔහුට පැහැදිලිවම පෙනී යයි .

හරි doctor අපි හෙට එන්නම් ..thank you very much 

දුරකථන ඇමතුම විසන්ධි වී ගිය පසු විශ්ව සිය අත මිට මොලවා yes යැයි කෑගැසීය.

මොකද යකෝ මේ ඔෆිස් එක දෙදරන්න කෑ ගහන්නේ...ඇයි මොකද ඩොක්ටර් කිව්වේ 

හෙට අපි දෙන්නට බණටයි දානෙටයි එන්න කිව්වා ...විශ්ව සිය මිතුරාගේ දෙවුරට දෑතම තබමින් පැවසීය. 

අප්පට සිරි අපි මෙහෙ ප්ලෑන් ගහනකොට එහෙන් ඉන්විටේශන් එකත් ඇවිල්ලනෙ....යමං යමං...බණ ඇසිල්ල කෙසේ වෙතත් උඹට ඩොක්ටර් ව බලාගන්නවත් බැරියැ...

නිසල් සිනහවෙමින් පැවසුවේය.

                                                                            *** 

යලි හමුවෙමු 

කිත්මා වාසනා දහනායක 

( විසිරි සිහින )