27 කොටස - හදේ කොතැනක හෝ හිඳී ඔබ

 27 කොටස 

26  කොටසට මෙතනින්    26

"ඇන්ටී, ඔයාට ෂුවර්ද විශ්ව අර කෙල්ලත් එක්ක තියෙන සම්බන්ධය නවත්තලා කියලා" 

ශෙරීනා විමසුවේ විශ්වගේ මව සමග අවන්හලක හමුවූ අවස්ථාවේදීය.

"මට පේන විදිහට මෙයාට ඇතිවෙලා නවත්තලා වගේ"

විශ්වගේ මව පැවසුවේ තමාහට දැනගන්නට කිසිදු හෝඩුවාවක් ඒ සම්බන්දගෙන් නොවූ හෙයිනි.

"ඇන්ටි මොනවද දන්නේ ඇන්ටි .ගෙදරට වෙලා ඉන්නවා විශ්ව ඒ කෙල්ලත් එක්ක එහෙ මෙහෙ යනවා කියන එක මං හොඳටම දන්නවා"

ශෙරීනා පැවසුවේ විශ්වගේ මව තවදුරටත් අවුස්සා ලීමේ බලාපොරොත්තුවෙනි .සිතූ පරිදිම ඇය බෙහෙවින් කෝප ගත්තාය. 

"මොනවා..මොනවා දුව ඔයා කොහොමද එහෙම කියන්නේ? මට කියන්න, මම ඒක ලෙහෙසියෙන් අත හරින්නේ නැහැ.අම්මා තාත්තා නැති කාත් කවුරුවත් නොමැති ඔය දේපලක් කියලා එහෙමටත් නැති ඔය වගේ කෙල්ලෙක් කාලෙකට හරි ආශ්‍රය කරනවට මම කැමැති නැහැ.ඉක්මනට ඔයාලගෙ වෙඩින් එක ගන්න ඕන." 

විශ්වගේ මව පැවසුවේ පාරමී පිළිබඳ දැඩි තරහක් හිතේ මවාගෙනය. 

ශෙරීනාගේ සිත තුළ විශ්ව හා විවාහවීමට කිසිදු අවශ්‍යතාවයක් නොවීය .

ඇයට අවශ්‍ය වූයේ කෙසේ හෝ ඔහුගේ ධනස්කන්ධය ලබා ගැනීම පමණි .

"නෑ..ඇන්ටි අපි මෙහෙම කරමු .අපි ඔය කෙල්ලව ටිකක් බය කරලා විශ්වගෙන් ඈත් කරමු .මමත් ලයිෆ් එක enjoy කරන්න කැමැති කෙනෙක් .ඉතින් මැරි කරන එක ටිකක් පහු උනාට කමක් නැහැ" 

ශෙරීනා පැවසුවේ ඉතාමත් යාප්පුවෙනි.

"ඔයාලගෙ වයසත් යනවනේ ළමයා .ඉතින් දරුවෙක් මල්ලෙක් හදාගන්න හරි වයසදි විවාහ වෙන්න ඕන."

විශ්වගේ මව යම්තාක් දුරට නොරිස්සුම් ස්වරයෙන් පැවසුවාය. 

"මේ අම්මණ්ඩි හිතාගෙන ඉන්නේ පුතණ්ඩියට මාව බන්දලා දීලා අර ලමයි හදන මැෂිමක් කරන්නද කොහෙද?

එව්වා කොහෙද මාත් එක්ක .අනේ නැන්දම්මේ, ඔයාගේ ඇස් ඇහැරෙනකොට මං මගේ මගේ dream එකට ගිහින් ඉවරයි."

ශෙරීනා යටිසිතෙන් සිනා මවමින් සිතුවාය.විශ්වගේ මව ඇයගේ උගුලේ පැටලී හමාරය.ඉතින් විශ්ව දැලට හසුවුනත් එකය.නැතත් එකය.අත්‍යාවශ්‍ය ලියකියවිලි සියල්ල අතට ගත් පසු විශ්ව ඕනකුදයක් ගහගත්තාට තමන්ට කමක් නැත.

                                                                            *** 

"අද උඹ එන්නෙ පරක්කු වෙලා හරිද ...මගෙ වැඩ වණ නොකර කියන විදියට කරපන් "

නිසල් උදේම විශ්වහට ඇමතුමක් දුන්නේ අවශ්‍ය කාරණා මතක් කරමිනි.

"හරි හරි..උඹ මොන නාඩගමක් හරි පරෙස්සමින් නටපන් හරිද"

විශ්ව පැවසුවේ සිය මිතුරාට ඇති ලෙන්ගතු කම නිසාමය.

"බයවෙන්න එපා.හැමදේම තිතට වෙයි"

නිසල් පැවසුවේ සිනහසෙමිනි.

"විශ්ව අද ඔයා ඔෆිස් යන ගමන් අනේ මාවත් පික් කරන්නකො"

ශෙරීනාගේ ප්‍රමාණයට නොගැලපෙන හුරතලය තමන්ගේ ඉවසීම පන්නමින් සිටිනා බව විශ්වට දැනේ.

"මට අද උදේ ෆොරින් මිනිස්‍ට්‍රි යන්න ඕනෙ. සොරි ශෙරීනා."

ඔහු පැවසුවේ නොසැලකිලිමත් හඬ යටපත් කරමිනි.

"මං දන්නවා උඹට අමාරුයි කියල.ඒත් පොඩි රඟපෑමක් කරපන් ටික දවසක්.මේ අම්මණ්ඩි කට්ටයි.ලෝක කට්ටයි.ඒ නිසා පොඩ්ඩක් ගොනාට ඇඳගෙන වගෙ හිටපන්."

පෙර දවසක නිසල් පැවසුවේ තමා තදබල ලෙසම ශෙරීනාගේ ආගමනය ප්‍රතික්ෂේප කරනාවිටය.

"මොනවද බං දෙකක් කියල එලියට දාන්නෙ නැතුව.මල වදයක් උනානෙ මේක"

විශ්ව පැවසුවේ මැඩනොගත් තරහෙනි.

"නෑ මේකෙ අල්ලගන්න පොඩි දෙයක් තියේ.මට හිතෙන දේ ඇත්ත නම් history repeat බං."

එදා නිසල් පැවසුවේ තමාගේ ඇස්දෙක විසල් වන පුදුමයෙනි.

"ම්..මොකක්..මොකක්..උඹ කියන්නෙ එතකොට අර බැ....ආයෙ ගේමට ඇවිල්ල කියලද .? මං අතාරින්නෑ අහුවුනොත් ඕකිව."

විශ්ව අසුනෙන් නැගිට්ටේ කෑගසමිනි.

"පිස්සො,ඉඳගනින් ඉඳගනින්.උඹෙ මේ මූලග්ගාය නිසා තමා මොකුත් කරගන්න බැරි.සැකයක් විතරයි තාම මට.උඹ මට මේක හැන්ඩ්ල් කරගන්න දීල පාඩුවෙ දොස්තර නෝනා එක්ක ලව් කරකර හිටපන්කො" නිසල් පැවසුවේ පාරමී සිහිකොට විශ්වගේ මුව මතට එන සිනහව හොරෙන් බලමිනි.

"බලපන්කො මතක් කලත් මුනෙ තියන සිරියාව.පැණි පෙරෙනව."

නිසල් පැවසුවේ හිනැහෙමිනි.

"හරි හරි එහෙනම් මම තියනව."

පෙරදා මතක ඔස්සේ සැරිසරමින් උන් නිසල් ජංගම දුරකතනය විසන්ධි කලේ ඉක්මනින් කාර්‍යාලයට යාමටය.

                                                              *** 

"ආ ගුඩ්මෝනින් ශෙරිනා.උදෙන්ම ඔෆිස් ඇවිල්ලනේ.ගුඩ් ගුඩ්"

කාර්‍යාලයට පැමිණ විශ්වගේ කාමරයේ තමා සම්බන්ධ කල මයික්‍රෆෝනයන් නිසි අයුරින් සකසා යළි පිටතට එන නිසල්හට කොරිඩෝරයේදී හමුවූයේ ශෙරීනාය.ඇය නොරිස්සුම් බැල්මකින් ඔහු දෙස බලා "මෝනින්" කීවාය.

තමා පසුකොට යන නිසල් දෙස බලාඋන් ශෙරීනා නැවත ඔහු ඇමතුවේය. 

"මෙ..මේ නිසල්, අද විශ්ව එන්න පරක්කු වෙනවද?"

කිසිදු මිත්‍රශීලි බවක් නැති මේ ගැහැනියට "මගෙන් අහන්නෙ උඹම හොයාගනින්කො"යැයි සිතින් කියූ නිසල් මවාගත් සිනහවකින් 

"ආ.අද මොකක් ද මිටින් එකක් කිව්වා."යැයි පැවසීය.

ඇය නිසල් දෙස උඩඟු බැල්මකින් බලා ආපසු හැරී කාර්‍යාලයට පිවිසුනාය.නිසල් වහා කෙටි කොරිඩෝරයෙන් තමාගේ කාමරයට පැනගත්තේය.

ශෙරීනා වහ වහා කාර්යාලයේ දොර වසා අගුලු දැමුවාය.එසේ නම් තමා කලින්ම ආ එක හොඳය.අදාල ලිපිගොනු ඉක්මනින් සොයාගත යුතුය.තමා හමුවන්නට එන්නිය මුණගැසෙන්නට දහයටවත් one gallface යා යුතුය.

ශෙරීනා විශ්වගේ මේසය මතවූ ලිපිගොනු සියල්ලම ඇවිස්සුවාය.විශ්වගේ කාමරයේ මේ වන විටත් cctv කුඩා කැමරා සවිකොට ඇති බව ඇය දන්නේ නැත .විශ්ව නිවසේ සිට සිය ජංගමයෙන් ශෙරීනාගේ නාඩගම සිනාසෙමින් බලාඋන්නේය.දාඩියමුගුරු දාගෙන ලිපිගොනු අවුස්සන ඇය අතින් විටෙක ලිපිගොනු බිම ඇදවැටේ.කොල සීසී කඩ යයි.යළි ඇය ඒවා අහුලා ඒ තුලට දමයි.විශ්ව හිතාමතාම ලොකරයන් දෙක අගුල් නොදමාම ආවේය.ශෙරීනා වහ වහා ඒවා විවෘත කොට ලිපිගොනු ඇද බලන්නට වූවාය.

ඇයගේ මුහුණේ ජයග්‍රාහි සිනහවක් මතුවූයේ කලුපැහැ ලිපිගොනුවක් බැලූ සැනිනි.ඇය අත මිට මොලවා යස් යැයි කියා වටයක් කැරකුණාය.විශ්ව සිනහව ගිලගනිමින් බලාඋන්නේය. වහ වහා මුද්‍රණ යන්ත්‍රය වෙත ගිය ශෙරීනා ඒ සියල්ල පිටපත් කොට ගත්තාය.ඒවා ලිපිගොනුවකට ගෙන මුල් ලිපිගොනුව යලි ලොකරයට දමා ඇමතුමකට සම්බන්ධ වූවාය.

"හරි මම දහයට එතන..ඔව් ඔව් ඉක්මනින් එන්න.මෙතනින් අද පැනගන්න පුළුවන් මට"ශෙරීනා වටපිට බලමින් පැවසුවාය.නිසල් සිනහව තද කරගනිමින් අසාඋන්නේය.

නවය පසුවී විනාඩි තිහක් පමණ වන විට ශෙරීනාගේ ජංගම දුරකථනයට ආ ඇමතුම සමග ඇය වහ වහා සූදානම් වූයේ පිටතට යන්නටය.නිසල් කිසිත් නොදන්නා සේ විශ්වගේ කාමරයට ආවේ ඒ මොහොතේමය.

"ආ ශෙරීනා කොහෙ හරි යන්නද...? කෝ විශ්ව නෑනෙ තාම නේද..?" නිසල් සුහද බවින් යුතුව ඇසුවේය.

"හ්ම්.."ශෙරීනා එපමණක් පවසා සිය ආලේපන කට්ටලයද රැගෙන වහා නානකාමරය වෙත ඇදුණාය.තමා මගහරින්නට ඇය දරන තැත දැක නිසල්ට සිනහා පහල විය.

"හරි හරි නෝනා ඔහොම යංකෝ....කකුලුව නටන්නෙත් වතුර හැලිය රත්වෙනකල් විතරනෙ. ?මාත් මේ ගින්දර දානගමන් ඉන්නෙ."නිසල් තමාටම පවසාගත්තේය.

ශෙරීනා පිටව ගොස් මොහොතකින් නිසල් කාර්‍යාලයෙන් පිටව ඇය පසුපස හඹා ගියේ ඇයටද නොදැනෙන්නය.

"ශේප් එකේ වරෙන් onegallface එකට.ඇවිල්ලා ඇතුලට නොයා කා පාක් එකේම හිටපන්.මම එනකල්.උඹ කැබ් එකක වරෙන්.උඹෙ වෙහිකල් එකේ එන්න එපා."නිසල් පැවසුවේය.

දෙමිතුරන් රිය අංගනයේදී හමුවූ පසු විශ්වහට එසේම ඉන්නට හැර නිසල් ආපනශාලා ඉසව්වට ඇදුණේ ශෙරීන් පැවසූ ස්ථානය සොයමිනි.කාර්‍යාල ඇඳුමට උඩින් කබායක් පැළඳ අව්කන්නාඩි දමා උන් හෙයින් නිසල්ගේ ස්වරූපය වෙනස්වී තිබිණ.

ඔහු නිසොල්මනේ ශෙරීනා තවත් අයෙක් සමග කතාබහ කරනා ඉසව්වට ආවේ ශෙරීනාට නොදැනෙන්නටය.ඒ කල්පනාය.විශ්වගේ ජීවිතය ගිනිතැබු කාන්තාවය.නිසල්ගේ සිත ආවේගයෙන් සහ කොපයෙන් සලිත වුවද ඔහු එය මැඩ පවත්වාගෙන ශෙරීනාට මුහුණට හසුනොවන සේ ඉඳගත්තේය.

"කලබල නොවී අහපන්.මෙතන ඉන්නෙ අපි හිතපු කෙනා තමයි.මට පොඩි වෙලාවක් දීපන් මෙතන ටිකක් නෝට් කරගන්න.උඹ ආවොත් වැඩේ වණ වෙනවා."නිසල් විශ්වහට ඇමතුමක් දී පැවසුවේය.විශ්ව මැඩගත නුහුණු කොපයෙන් අතමිට මොලවා අසල වූ බිත්තියට පහරක් ගැසීය.

"උඹ ආයෙ ආවා එහෙනම්..මාව කාලා ගියා මදිවට ආයෙ ආවා.මේ නම් මගෙ ආත්ම වෛරක්කාරියක්"විශ්ව තමාටම පවසා ගත්තේය.

                                                                      *** 

ශෙරීනා සිය බෑගයෙන් අදාල ලිපිගොනුව අතට ගත්තේ ජයග්‍රාහී සිනහවක් ඇතිවය.කල්පනා එය අතට ගෙන පෙරලා බැලුවාය.දෙස් විදෙස් රාජ්‍යතාන්ත්‍රික සම්බන්ධතා එක්කරන මහා ව්‍යාපෘතියක පරිසර හිතකාමී ගොඩනැගිලි සංකීරණයක යෝජනාවලිය එහි තිබිණ.ඉදින් සියලුම දත්ත තමන් අතට පත්ව ගොසින් හමාරය.කල්පනා ජයග්‍රාගී සිනහවකින් ශෙරීනාට අතට අත දුන්නාය.

"වෙල්ඩන් ගර්ල්.මෙච්චර ඉක්මනින් මේක කරගන්න පුළුවන් වෙයි කියලනම් මං හිතුවෙ නැහැ.ඒකෙන් තේරෙන්නේ එකක්.. ඔයා මං හිතුවට වඩා මාරම ටැලන්ටඩ් ..අනිත් දේ තමයි එක පාරක් මට්ටු වෙලත් විශ්ව කියන මිනිහා නම් පාඩමක් ඉගෙන ගන්නේ නැති තරම්ම මෝඩයි. මේ වගේ document එකක් තමන්ගෙ ලොකර් එකේ දාලා යන්න තරම් careless කියන්නේ කවදාවත් හැදෙන එකෙක් නෙමෙයි" කල්පනා පැවසුවේ පෙර දවසක තමා ඔහු මුලාවේ හෙලූ අන්දම සිහිකරමිනි.

"මිනිහා මේ දවස් වල ඉන්නේ ලව් එකක පීක් එකේ..ඉතින් කන්න බොන්නවත් සිහියක් නෑ ඒක ගැනමද කොහෙද හිතේ තියෙන්නේ. සාමාන්‍යයෙන් මේ ලොකර් එක ලොක් කරලා key එකත් අරගෙන තමයි විශ්ව ඔෆිස් එකෙන් යන්නේ .ඊයෙ හවස උනේ හදිස්සියෙම මං හිතන්නේ අර girl ගෙන් කෝල් එකක් ආවා .මිනිහා ඒ කල්පනාවෙන්ම තමයි පුටුවෙන් නැගිටලා යන්න ගියේ." ශෙරීනා පැවසුවේ ඊයෙ හවස විශ්ව කාර්යාලයෙන් පිටත් වී ගිය අන්දම සිහිකරමිනි.

"අහ්..මිනිහට දැන් කෙල්ලෙක් ඉන්නවද ? " කල්පනාගේ ස්වරයේ ඇතිවූයේ තරමක ඉරිසියා සහගත හඬකි . තමා ඔහු හැරදා ගිය දින පටන් අවුරුදු ගණනාවක් යන තුරු බීමතටම ඇබ්බැහි වූ විශ්ව කිසිදු කාන්තාවක් සමග සම්බන්ධකමක් පටන් ගත්තේ නැති බව කල්පනාට විටින් විට ආරංචි විය . එම හේතුවම ඇයට තමා ගැන ඉහළම තක්සේරුවක සිටින්නට තරම් හේතු විය .තමා ඔහු එතරම්ම රවටා දමා තිබියදීත් වෙනත් කාන්තාවක් සමඟ ඇසුරක් පටන් නොගන්නේ තමා ගැන තිබූ තිබු ආදරය නිසා ඇයි ඇය විශ්වාස කළාය. නමුත් සත්‍ය හේතුව වූයේ කල්පනා විසින් සිදුකළ ඒ වංචනික ක්‍රියාවල හේතුවෙන් විශ්වට සියලුම ගැහැණු සංහතිය එපා වී තිබීමය.

" ඔවු ඔව් ආරංචි හැටියට නං ඩොක්ටර් කෙනෙක් කියලයි. මේ දවස් වල මිනිහා ඉන්නේ මාර romantic mood එකක. "

ශෙරීනා පැවසූයේ කල්පනාගේ ඉරිසියාව තව තවත් වැඩි කරමිනි.

" එතකොට විශ්වගෙ අම්මා කොහොමද ?" කල්පනා ශෙරීනා ගෙන් ඇසුවේ විශ්වගේ මව ගැන කල්පනාවෙත්ම හිතේ ඇතිවූ අධික ද්වේශයෙනි .විශ්ව සමග වංචනිකව හෝ ප්‍රේම සම්බන්ධය තිබූ කාලයේ විශ්වගේ මව තමා හට නිතර නිතර බැන වැදීම සහ ප්‍රතික්ෂේප කිරීම සහ හෙළා දැකීම නිසා තමා පත් වූයේ දැඩි අසීරුතාවයන්ට බව කල්පනාට සිහිවිය.

"එයාද ...එයාට ඒකෙනාව පේන්න බෑ කල් කදුරු වගේ .ඒ අම්මණ්ඩිට ඕනෑ ඉක්මනටම මාව විශ්වගෙ කරේ ගහන්න.මං මේ හරි අමාරුවෙන් කර ඇර ඇර ඉන්නවා." ශෙරීනා සිනහසුණේ මහ හඩිනි.

"දේපලයි බූදලේයි යනකොට අරන් යන්න හිතන් ඉන්න ඒ අම්මණ්ඩිට නම් හොඳම පාඩමක් උගන්වන්න ඕනේ . මේ වැඩේ ඉවර වෙච්ච ගමන් ශෙරීනා ඔයා මාත් එක්ක ආපහු යන්න එන්ඩ ඕනේ .ඔයාට මෙහෙ ඉන්න බැහැ.දන්නවනේ අනිවාර්යෙන්ම ලොකු රිස්ක් එකක් එනවා" කල්පනා පැවසුවේ ශෙරීනා ගේ අතින් අල්ලා ගනිමිනි.

                                                                        *** 

එහෙනම් කල්පනා ඔයයි මේකෙ ආපහු මහමොළකාරය උනේ . ශෙරීනා කියන්නේ ඔයාගේ අතකොළුවක් විතරයි. ඒ උනාට ඔයාව මේකට මෙහෙයවන්නෙ කවුද කියලයි මට දැනගන්න ඕනෙ..."

නිසල් ඔවුන්ගේ පිටුපස සිට කල්පනා කළේය .

මේ වන විටත් විශ්ව අධික නොසන්සුන්තාවයකින් රථගාලේ සිටිනු ඇති බව නිසල්ට වැටහුනි .ඔවුන් දෙදෙනාගේ කතාබහ ඉන්පසුව හැරවුනේ සාප්පු සවාරි සහ මෝස්තර නිර්මාණ ආදිය ගැන ය .තවදුරටත් මෙතන කාලය නාස්ති කළ යුතු නොවන නිසා නිසල් සෙමින්ම එතැනින් නැගිට ආපසු රථ ගාල වෙත පැමිණියේය 

"මොකද උනේ"

විශ්ව කලබලයෙන් මෙන් ඉදිරියට පැමිණ නිසල් ගේ අතින් අල්ලා ගනිමින් ඇසීය .

"යමන් මෙතනින්. මං යන ගමන් කියන්නං "

නිසල් රථයට නැග විශ්ව සමගින් පිටත් විය .

"එහෙනම් මේකයි සෙල්ලම. කල්පනා උඹ හිතුවා මට අතීතය මතක නෑ කියලා ඒක මං මලත් අමතක කරන්නේ නැහැ .ඒ සැරේ වැටුණු වැටිල්ල මං ආපහු වැටෙනව කියලා උඹ හිතාගෙන ඉන්නවනම් ඒක උඹ කරගත්තු ලොකුම වැරැද්දක්.." 

නිසල් සියලු කතාව පැවසූ පසු විශ්ව තමාටම කියා ගත්තේය 

"අපි duplicate එක විදිහට හදපු වැරදි ෆයිල් එක තමයි දැන් ඔය ෂෙරීනා පොටෝ කොපි කරගෙන ගියේ . මුන් මේකේ වැඩේට බහින්න කලින් අපි අපේ වැඩේ කරන්න පටන් ගන්ඩ ඕනේ .කවද්ද උඹට agreements සයින් කරන්න තියෙන්නේ."

නිසල් ඇසුවේ විශ්වගේ උරහිසට අත තබමිනි.

"සඳුදාට ..අපි ඒ වැඩ ටික පුළුවන් තරම් සීක්‍රට්ව කර ගන්ඩ ඕනේ.අද සිකුරාද නිසා සෙනසුරාදයි ඉරිදයි කොහොමත් කල්පනාල ඕකට අත ගහන්නේ නැහැ. ගෑනි සඳුදාට වැඩේට බහින කොට අපි මෙහේ වැඩ ඉවර කරලා තියෙන්න ඕනේ."

විශ්ව පැවසුවේය

"එහෙනම් දැනම් ඔෆිස් එකට යමු. ශෙරීනා ආපහු ඔෆිස් එකට එනකොට අපි මේ මොකුත් නොවෙච්ච විදිහට ඉම්මු.අද හවස් වරුවෙම අදාල ඩොකියුමන්ට් ටික ඉක්මනට අපි ලෑස්ති කර ගම්මු." 

නිසල් පැවසුවේ තවදුරටත් කල්පනා කරමිනි .මෙය එතරම් පහසුවෙන් හෝ සැහැල්ලුවෙන් ගණන් නොගත යුතු කාරණයක් නොවේ . 

කල්පනා සහ ශෙරීනා අර අඳින්නේ සුළුපටු කාරණයකට නම් නොවන බව නිසල්ට විශ්වාසය .එක්කෝ කල්පනා දැන් වැඩ කරන්නේ අන්තර්ජාතිකම කඩාකප්පල්කාරී සංවිධානයක් එක්කය. ගැහැනියක් වීත් මේ සා තමා පසුපසම පන්න පන්නා පහර දෙන්නට මේ ගැහැනියට ඇත්තේ පුදුමාකාර වූ වෛරයක් විය යුතුය. මේ සියල්ලේ අග මුල සොයා ගත යුතුයැයි විශ්වට දැන් දැන් සිතෙයි.

                                                                  *** 

ශෙරීනා ආපසු කාර්යාලයට පැමිණෙන විට නිසල් අදාල වැඩ කටයුතු සඳහා පිටත්ව ගොස් තිබුණේය.විශ්ව ආයාසයෙන් කේන්තිය පාලනය කර ගනිමින් ශෙරීනා එන පෙරමඟ බලා උන්නේය .

අනේ විශ්ව ඔයා හුඟක් වෙලාද ඇවිල්ල...ඔයා නැතුව මට මෙතන ඉන්න මොකද්ද වගේ අනේ ..අර නිසල් හැම තිස්සේම මේ කාමරයට එනවා ඔයා නැති උනාම .මට ඒක හරිම ඔඩ්. ඉතින් මං පොඩ්ඩක් එළියට ගියා."

ඕනෑවටත් වඩා මවාගත් ආදරයක් දැවටුණු කටහඬකින් ශෙරීනා ආවේ විශ්වගේ ආසනය අසලටමය . විශ්ව නිහඬවම ඇයගේ දෑස් දෙස බලා උන්නේය .ශෙරීන් එයින් මහත් අපහසුතාවයකට පත් වූයේ තම සිත තුළ වූ වංචනික තත්වය වැටහේද යන සැකයෙනි .

"අනේ ඉතින් ඇයි තරහෙන්ම වගේ බලාගෙන ඉන්නේ ..මං නැතුව ඔයා පාලුවෙනද උන්නේ ?"

ශෙරීනා විශ්වගේ පුටු ඇන්ද මත හිඳගත්තේ අඩමානයටය. 

"shereena this is my office ..so you have to behave well."

විශ්ව ආසනයෙන් නැඟී සිටිමින් පැවසුවේය .

"ඉතිං ඒක තමයි මම කියන්නේ ඔෆිස් එකේ නැතුව අපි නිදහසේ හම්බෙන්න කොහේ හරි යමුකෝ කියලා .මොකක්ද විශ්ව මේ ජීවිතයේ හරි බෝරින් නෙ."

ශෙරීනා සිය අසුනට යමින් පැවසුවාය 

"මට ඕනවටත් වඩා වැඩ තියෙනවා කරන්නේ ශෙරීනා .මට international ප්‍රොජෙක්ට් එකක් ඇවිල්ල තියෙන වෙලාවේ ඔයා විකාර කරන්න නම් එපා." 

විශ්ව ඇය දෙස හොරැහින් බලමින් පැවසුවේය .

"කරයි උඹ international projects .ලබන සතියේ වෙනකොට විශ්ව උඹට වහ කන්නයි වෙන්නේ."

ශෙරීනා යටි හිතින් සිනහසෙමින් සිතා ගත්තාය .

                                                                  *** 

"අනේ අනේ එක්කෙනෙකුට දැන් මාව මතක නෑ ."

ඇමතුමක් ලද වහාම පාරමී නෝක්කාඩු කියන්නට වූයේ විශ්වගේ මුවට සිනහවක් එක්කරමිනි .

"ඔන්න පටන් ගත්ත රණ්ඩුවෙන්ම...අනේ කෙල්ලේ මේ සතියේ විතරයි මට ඕනා .ඊට පස්සේ ඔන්න මගේ සම්පූර්ණ කාලයම මම ඔයාටයි දෙන්නේ .

විශ්ව පැවසුවේ සිනහා වෙමිනි 

"මං දන්නවා විශ්ව ..කොහොමද ඔයාගේ ප්‍රොජෙක්ට් එක .මේ වෙනකොට පටන්ගන්න වැඩ කටයුතු ටික ඉවරද?"

පාරමී ඇසුවේ ඉතාමත් මුදු ස්වරයක් හඬෙහි ඇතිවය 

"කියන්න නම් ගොඩක් දේවල් තියෙනවා මැණික .අපි හිතනවට වඩා ගොඩාක් ප්‍රශ්න මේ ප්‍රොජෙක්ට් එකට එනවා .නිසල් මගේ ළඟ ඉන්න හින්දා ඇත්තෙන්ම මේ වැඩ කටයුතු කරගෙන යන්න ලේසියි .නැත්තං අපි හිතනවට වඩා බොහොම භයානක තත්වයක් අපි අවට කරකැවෙන්නේ "

විශ්ව පැවසුවේ කල්පනාවෙන් යුතුවය.

"මොනව වුනත් ඔය දෙන්නම පරිස්සමින්." 

පාරමී ඇමතුම නිමා කරන මොහොතේ පැවසුවාය.

මේ ව්‍යාපෘතිය අවසන් වූ වහාම පාරමී සහ තමාගේ විවාහ ලියාපදිංචි කළ යුතුය .පෙරදා තරම් විවාහය ගැන කතා කරනා විට කණු කුණු ගෑමක් පාරමීගේ ද නැත.තමන්ගේ අම්මා වෙනස් වේ යැයි සිතමින් තව තවත් කාලය ගැනීමේ තේරුමක් නැති බව පාරමීද වටහා ගෙන ය .

ජීවිතය කෙතරම් හුදෙකලාවක ගතවීදැයි තේරුම් යන්නේ සෙනෙහස් ඇසුරත් ජීවිතයට ළඟා වූ පසුවය .උදෑසන ඇරඹුන මොහොතේ පටන් රාත්‍රියේ නින්දට යන මොහොත දක්වා ම ඇයගේ සෙනෙහසෙහි කෙටි සටහන් සිය ජංගම දුරකථනය මත දිස්වෙනන අන්දම විශ්ව කල්පනා කළේය .

තමා කෙතරම් කාර්ය බහුල වුවද ඒ හා සමානව ඇයද කාර්යබහුල බව ඔහු දනී .නමුත් පාරමී හැකි හැම මොහොතේම විශ්වගේ වැඩකටයුතු ගැන, ඔහුගේ ශරීර සෞඛ්‍යය ගැන සොයා බැලුවේ ඔහුගේ යහපත් මානසිකත්වය ගැන නිතරම සැලකිලිමත් වෙමිනි.

විශ්වගේ චර්යාවෙහි වූ නිතර නිතර දැඩි ලෙස කේන්ති යන ගතිය බොහෝසෙයින්ම පාලනය වූයේ පාරමීගේ ඇසුර හෙයින් ම ය . ඉතින් තමා ඇය තවදුරටත් බොහෝ දුරින් තබා ගෙන සිටින්නේ කුමකටදැයි විශ්ව නිතරම සිතුවේය .උදෑසන අවදි වන මොහොතේ පටන් රාත්‍රී නින්දට යන මොහොත දක්වාම ඇය තමාගේ ඇස් මානයේ දැවටිය යුතු ය.ජීවිතය ආදරයෙන් පුරවාලිය යුතුය .මෙතෙක් කල් ජීවිතයට අහිමි වූ සෙනෙහස ඇති උණුසුමක් දැඩි ලෙස අවශ්‍යව ඇත.

********************************************************************************* 

යලි හමුවෙමු 

කිත්මා වාසනා දහනායක 

(විසිරි සිහින)