28 කොටස - හදේ කොතැනක හෝ හිඳී ඔබ

 28 කොටස

27  කොටසට මෙතනින්   27

පාරමී සිය ඇමතුම විසන්ධි ව ගිය පසු නිල නිවස වෙත පැමිණියේ කෙටි විවේකයක් සඳහාය.රහල් සහ ප්‍රසංගිගේ විවාහයට පසු රහල් නැවත විදේශ ගත වීය . ඉතින් තමාහට යලි නවක වෛද්‍යවරුන් දෙදෙනෙකු සෞඛ්‍ය අමාත්‍යංශය වෙතින් පත්කොට ඒවා තිබුණි .එහෙයින් තමා හට එතරම් රෝගී සත්කාර සේවාවන්හි කාර්යබහුල තාවයක් මේ වන විට නොතිබුණි .

කෙසේ හෝ සති දෙකක ඇවෑමෙන් විවාහය ලියා පදිංචි කළ යුතු යැයි විශ්ව තදින්ම පැවසූ හෙයින් පාරමී ඒ සම්බන්ධයෙන් සිය නිවාඩු අනුමත කොට ගත්තාය .විශ්ව සහ පාරමී දෙදෙනාම අති උත්කර්ශයෙන් විවාහ මංගල්‍ය කටයුතු පැවැත්වීමට අකමැති වූ හෙයින් නීත්‍යානුකූල මාර්ගයෙන් විවාහයේ කටයුතු කොට විදෙස්ගත විය යුතුයැයි තීරණය කොට තිබිණි.

"සති තුනක්වත් නිවාඩුවක් දැන්ම ඇප්ලයි කරලා තියාගන්න පාරෝ. අපි දෙන්න ටුවර් එකක් යමු. මං දන්නවා ඔයා හරි ආසයි ඇවිදින්න . මගේ ජීවිතයෙත් ඉස්සර තිබුනේ ට්‍රැවලින් කියන එක අංක එකට .ඒත් මගේ ජීවිතේ හැමදේම මට නැති කරා .අපි ආපහු අංක එකේ ඉඳලම ඒ දේවල් පටන් ගන්න ඕන පාරෝ."

පාරමී සමගින් සංචාරය කළ යුතු රටවල් සහ සුන්දර ස්ථානයන් එකින් එක බලමින් විශ්ව සිය සැලසුම සකස් කළේය. නව විශේෂඥ පුහුණුව ලබන වෛද්‍යවරුන් වාට්ටුවල වැඩ කටයුතු බලා ගන්නා හෙයින් පාර මීට සති දෙකක නිවාඩුවක් ඉතා පහසුවෙන් අනුමත කරගැනීමට හැකි විය.

                                                                *** 

ඉරිදා රාත්‍රියේ නිමා වූයේ කිහිප දෙනෙක්ගේ අරමුණු විවිධාකාර අන්දමින් සකස් කරමිනි. එකම කාරණයක් ඔස්සේ දියත් වුණු විවිධාකාර මට්ටමේ අරමුණු සාර්ථක වීම හෝ අසාර්ථක වීම හෙට දවස මත තීරණය වෙයි .

"පාරෝ....හෙට තමයි හැමදේම ලස්සනටම අපේ වැඩ කටයුතු ටික පටන්ගන්න එක කෙරෙන්නෙ .හෙට ප්‍රොජෙක්ට් එකේ ඇග්‍රිමන්ට් එකක් සයින් කළාම අපේ ඉදිරිගමන කවදාටත් වඩා හොඳින් පැහැදිලි වෙනවා .හැබැයි අන්තිම මොහොත දක්වාම අපි ඉන්නේ risk එකක."

විශ්ව පැවසුවේ බලාපොරොත්තු රැසක් පිරි හදිනි.

"ජීවිතයේ මොන up and downs ආවත් ඔයාට මමත් මට ඔයත් ඉන්නවා විශ්ව . ඒ නිසා trust me ..හෙට ඔක්කොම ඔයාට ඕනම විදියට ලස්සනට කෙරේවි .all the best my love."

පාරමී පැවසුවේ ඉතාම ආදරයෙනි.

"ජීවිතයේ අන්තිමටම වැටිච්ච , ජීවිතයම එපාවෙච්ච, නාස්තිවෙලා උන්න මට ජීවිතේ කියල දුන්නෙ ආයෙ මෙහෙම තැනකට එන්න හයිය දුන්නේ ඔයායි පාරෝ.ඒ කාලකණ්ණි කමෙන් නාස්තිවෙලා උන්න මාව ආයෙ මොන බලවේගයකටවත් එහෙම වට්ටන්න බෑ.ඔයා මගේ ළඟ ඉන්නකල්."

විශ්ව ඇයගේ මුහුණ ජංගමයේ තිරයෙන් නොපෙනී යන මොහොතේ පැවසීය.

මේ මොහොත වන විට කල්පනා මෙන්ම ශෙරීනාද උන්නේ පසු දවසේ කුමක් සිදුවේද යන නොසන්සුන් භාවයෙනි.අදාල ගිවිසුම සම්බන්ධයෙන් කල්පනා සිය ප්‍රධානීන් දැනුවත් කොට ඒ සම්බන්ධ ක්‍රියාමාර්ග ගන්නට යන්නේ සඳුදාය.ඇය සඳුදා දිනයේ විශ්ව සිය ගිවිසුම අත්සන් කරන බව නොදැන උන්නේ ඇය සතුවූ ලිපිගොනුව ව්‍යාජ එකක් වූ හෙයිනි.

විශ්ව නව පෙම්සබඳතාවක් අරඹා ඇතැයි යන්න කල්පනාගේ මනසට යම් බලපෑමක් නොකලාම නොවේ.මන්ද තමා ඔහුව අවුරුදු ගණනාවක් රැවට්ටුවද ..ඔහු තමාහට ආදරය කල අන්දම කල්පනාගේ මතකයේ පවතී.තමා වෙනුවෙන් ඔහු කැප නොකළ දෙයක් නොමැත.එමෙන්ම ඔහු ඉතා ආදරණීය උණුසුම් හැඟුමැති පෙම්වතෙකි.තමා විසින් භාරගත් කටයුත්ත ඉතා බරපතල එකක් වූ හෙයින් ඔහු ගේ නව පෙම් සබඳතාව ගැන නොහිතා සිටින්නට තැත් කළද ඇයගේ සිතෙහිද තමන්හට යමක් අහිමිව ගිය හැඟීම හැමදාමත් පැවතුණි.විශ්වගේ පරම සතුරාවූ ටෙරන්ස් නාගහවත්තගේ ග්‍රහණයට තමා හසුවූයේ විශ්ව විද්‍යාල අධ්‍යාපනය හදාරන කාලයේදීමය.ඔහුගේ අතකොලුවක් වන්නට තමාට සිදුවූයේ ඉබේමය.අදටත් ඔහු තමා ඇමක් කොට ගනිමින් ව්‍යාපාර ලෝකයේ බොහෝ ප්‍රමුඛයන් මුලාකරමින් පාගාදමන්නට හුරුව ඇත.ඒ කෙසේ වෙතත් මැලේශියාවේ සිට සිය වෛරය තවමත් ලංකාවේ සිටින විශ්ව වෙත යොමා ඇති ටෙරන්ස් නාගහවත්ත මෙවරද කල්පනා යොමුකලේ විශ්ව හට ප්‍රහාර එල්ලකරන්නටය.ඔහු හෙට දවසේ ලංකාවට ඒමට නියමිතව ඇත.

මේ අතර විශ්වගේ මවද සිය වෛරී සිතුවිලි සමග පොරබදමින් කාලය ගතකලේ ශෙරිනා විසින් තව තවත් අවුල් කල මනසින් යුතුවය.පාරමී කෙසේ හෝ විශ්වගෙන් ඈත්කල යුතුයැයි ඇය තරයේම සිතාගත්තාය.එහෙත් ඇයට ජීවිත හානියක් කර තමාට ගැලවීමට නොහැකි හෙයින් කෙසේ හෝ ඇයව බියවැද්දවිය යුතුව ඇත.

"සෑම්...මට මේ වැඩේ අදහෙටම කෙරෙන්න ඕනෙ."විශ්වගේ මව තමා දැනහඳුනන කුලී මැරයකුගෙන් සහය පැතුවේ එබැවිනි.

"මැඩම් මොකද වෙන්න ඕනෙ...උස්සන්නද අතක් පයක් කඩන්නද නැත්නම් ඊට එහා ලෝකෙට යවන්නද...කියන්න ගාන ඉතින් වැඩේ හැටියට තමා"සෑම් නැමැත්තා විශ්වගේ මවට මින් පෙරද සිය සේවය සැපයුවේ ව්‍යාපාර ගැටලු වලදීය.

"නෑ නෑ පිස්සුද පොඩ්ඩක් බය කරල මේ අපේ එකාට එපා කරවන්නයි මට ඕනෙ.බරපතල දේවල් එහෙම හිතන්නවත් එපා."විශ්වගේ මව ඉතා කලබලයෙන් පැවසුවාය.

"හරි හරි එහෙනම් පොඩි සෙල්ලමක් දාල බයකරන්නම්කො.ආයෙ විශ්ව මහත්තය යන පාරකවත් නොයන්න හිතෙන්න බය කරන්නම්කො.පනහකට වැඩේ ශේප් එහෙනම්.හරිනෙ මැඩම්."

සෑම් පැවසුවේ අවිනීත ලෙස මහ හඬින් සිනාසෙමිනි.

ශෙරීනා සම්බන්ධ කටයුත්ත යනු විසල් ආයෝජනයක්ම හෙයින් විශ්වගේ මව දෙවතාවක් නොසිතා ඒ මුදල ඔහු අත තැබුවේය.ඔහු පිටව් ගිය පසු ඇයගේ මුහුණේ මතුවූයේ තෘප්තිමත් සිනහවකි.

"ඒ කරදරේ ඉවර උන ගමන් ශෙරීනාව මෙයාට බන්දල දෙන්න ඕනෙ.අරකි වගේ මූත් හිතුවක්කාරෙට හැදුණොත් මේ මහන්සියෙන් ගොඩනගපු ඔක්කොම ඉවරයි."

ඇය තමාටම කියාගත්තාය.

                                                                          *** 

සඳුදාව උදාවූයේ කවදාටවත් වඩා සොඳුරුවය.විශ්ව නිවෙසින් පිටත්ව ආවේ අඩුමතරමේ සුබ මොහොතක් වෙනුවෙන් සිය මවගේ ආශීර්වාදවත් නොලබාය.ඇය මේ සම්බන්ධව දැනුවත් වීම යනු ශෙරීනාහට සියල්ල වාර්තාවීම බව දැන උන් හෙයින් විශ්ව නිසල් සමගින් අදාල ස්ථානයට පැමිනියේ නිහඬවමය.

"Best wishes රත්තරන් ...ඔයාට මේ හැමදේම සාර්ථකම වෙනවා.තෙරුවන් සරණයි"පාරමීගේ ඒ ආදරණීය ඇමතුම නොලබා සිය දවස සම්පූර්ණ නොවන බව විශ්ව දැන උන්නේය.නිසල් සිනහවක් හෙලා ඉවත බලාගත්තේ මේ පෙම්වතුන්ගේ අපූරු ආදරය දැන් තමාටද නොරහසක් හෙයිනි.

"වෙලාව හරි කෙල්ලෙ.අපි ඇතුලට යනවා. ඔයා හොස්පිට්ල් යනවද?"

විශ්ව ඇසුවේ ආදරණීය හඬකිනි.

"ඔව් දැන් මම හොස්පිට්ල් ගිහින් හවස මිනිස්ට්‍රි එකට යන්න ඕනෙ .ෆොරින් ලීව් එකේ වැඩ ටික බලන්න.එහෙනම් මම ඉවර වෙලා කෝල් එකක් දෙන්නම්"පාරමී සමුගත්තේ සුපුරුදු සුබපැතුම් යළි පතාය.

"අපිට කොයින්ද දෙයියනේ රත්තරන් කියල කෝල් කරන්න අය"

නිසල් විශ්වට ඉඟිමරමින් පැවසීය.

"අර ශෙරීනාව සෙට් කරල දෙන්නද...මයි ඩාලින් කිය කිය වටේ කැරකෙයි" 

විශ්ව ඇසුවේ මහහඬින් සිනහාසෙමිනි.

"බුදු අම්මෝ බං...සදා තනිකඩ වෙන්නම්..එහෙම ගෑනුනම් එපා" 

නිසල් දෝතම එක්කර වැඳ පැවසීය.

"කොහොමද mr.ජයසූරිය ...කාලෙකට පස්සෙ අපි ආයෙ එකට හමුවෙන්නෙ මේ නේද?" 

රජයේ පාර්ශ්වය නියෝජනය කරමින් පැමිණි ඉහළ නිලධාරියා විශ්වට අතට අත දෙමින් පැවසීය.

"ඔව් මගෙ කලින් කම්පැනි එක තිබ්බ කාලෙ අපි ප්‍රොජෙක්ට්ස් තුනහතරක් කරන්න හම්බවුනානෙ"

විශ්ව පිලිතුරු දුන්නේය.

"ඒ කම්පැනි එක එච්චර ඉක්මනින් ටෙරන්ස් නාගහවත්ත අතට යාවි කියල අපි හිතුවෙ නෑ මිස්ටර් ජයසූරිය ..මොකද මිනිහා ට්‍රස්ටබල් කැරැක්ටර් එකක් නොවෙන නිසා.ෆීල්ඩ් එකේ සෑහෙන කට්ටියක් බුලි කරල මෑන් තැන හදාගෙන අන්තිමට රට පැන්නා."

ටෙරන්ස් නාගහවත්ත ගේ නම ඇසීම විශ්ව මවිතයට පත්කරන්නක් විය.ඔහු සිය විශ්වවිද්‍යාල ජීවිතයේ සිටි ප්‍රධානම ප්‍රතිවාදියායි.

"එහෙනම් ටෙරන්ස් උඹ මේ මගෙන් ගත්තේ බොහොම කාලෙකට කලින් තිබ්බ තරහකට පලියක්.එතකොට කල්පනා උඹට සෙට්වුනේ ඇයි කියන එක ඔතනදි ගණන් නොගන්න තරමටම පොඩි කාරණයක්"

විශ්ව සිතින් සිතුවේ මුහුණේ ඉරියව් වෙනස් නොකරමිනි.

"කොහොම උනත් මිස්ටර් ජයසූරිය , ඔයාගේ කම්පැනි එකත් එක්ක වැඩ කරන්න ගවර්න්මන්ට් එක කැමතියි.ඔයාගේ කලින් රිපෝට්ස් ඔක්කොම බලල තමා මේ ඩිසිෂන් එක අපි ගත්තෙ.ඔයාගේ අලුත් කම්පැනි එකට ග්ලෝබලි මාර්ක් වෙන්න හොඳම අවස්ථාවක් මේක.So..shall we meet our foreigne delegates ...come come..."

රජයේ නියෝජිතයා සමග විශ්ව පෙරට ගමන් කලේ නිසල් ද සමගිනි.

හැමවිටම ජීවිතය නරක සහ නපුර ගෙන එන්නේම නැත.වැටුණ හැම මොහොතක්ම අනාගතයට අත්වැලක් කරගැනීම තමන් සතු කාර්‍යයකි.විශ්ව දෙස් විදෙස් නියෝජිතයන් සමග ගිවිසුම් අත්සන් කලේ අනාගතය පිළිබඳ සුබ ලකුණු සියල්ලම හදවතේ සටහන් කරමිනි.

                                                                          *** 

"කවදාවත් නැතුව විශ්වගෙ ෆෝන් එක ඕෆ්..මොකද මන්දා.නිසල් කාරයා ෆෝන් එක ආන්ස්වර් කරන්නෙත් නෑ."

ශෙරීනා මුමුණමින් කාර්‍යාල කාමරයේ එහෙට මෙහෙට ඇවිද්දාය.

"ආන්ටි විශ්ව ඔෆිස් ආවද අද...?" අවසානයේ ශෙරීනා විශ්ව ගේ මවට ඇමතුමක් ගත්තාය.

"ඔව්නෙ දුව .උදෙන්ම ගෙදරින් ආවනෙ.ඔයා ෆෝන් එකට අරන් බැලුවෙ නැද්ද?" 

විශ්වගේ මව එතරම් ගණනකට නොගත්තේ සාමාන්‍යයෙන් විශ්ව යනඑන තැනක් ඇය නොදන්නා හෙයිනි.

"ෆෝන් එකත් ඕෆ්නෙ ආන්ටි.මම ඒකයි බැලුවේ."

ශෙරීනා ඇමතුම විසන්ධි කලේ නොසන්සුන් බවිනි.

ඇයගේ ජංගමයට ඇමතුමක් එකෙණෙහිම ආවේ කල්පනාගෙනි.

"හෙලෝ කල්පි..."

ශෙරීනා ඇමතුමට එක්වූයේ සිනාවතිනි.

"හෙලෝ...හෙලෝ තමයි..මොකක්ද ගෑණියේ මේ නටපු නාඩගම."

කල්පනාගේ කෝපාවිශ්ට හඬ ශෙරීනාහට කුමක් හෝ වරදක් වී ඇතැයි පහදාදෙමින් තිබුණි.

"මොන විකාරයක් ද මේ කියන්නෙ කල්පි..ඇයි මොකද වෙලා තියෙන්නෙ?"

ශෙරීනා ඇසුවේ කල්පනාට නොදෙවනි ආවේගයකිනි.

"තමුසෙ මට ගෙනල්ල දීල තියෙන්නෙ false document එකක්.ඒක බොරුවක්.ඒකෙ details ලොක්කා ලංකාවට ආව ගමන් චෙක්කරල.දැන් අපි දෙන්නම ඉවරවෙන්න යන්නෙ"

කල්පනාගේ හඬ ශෙරීනා බියගැන්වූයේය.

"ඉ..ඉතින් කවුද දන්නෙ එහෙම එකක්..ලොකර් එකේ තිබ්බ එකනෙ මම ගත්තෙ "

ශෙරීනාගේ හඬ ගොතගසමින් තිබුණි.

"ලොක්කාට අපේ නිදහසට කරුණු අදාලම නෑ ශෙරීනා. තමුන් කෝකටත් පරෙස්සම් වෙනවා.ඔය මිනිහා තරහ ගියාම පොලඟා වගෙ ..පන්න පන්න දෂ්ට කරන්නෙ."

අවසාන අනතුරු ඇඟවීමද කලපසු කල්පනා ඇමතුම විසන්ධිකලාය.

තමා කෙසේ හෝ අවසානයේ පැටලුණේ ලිහාගත නොහැකි පඹගාලක බව ශෙරීනාට අවබෝධවිය.ටෙරන්ස් නාගහවත්ත යනු අණක්ගුණක් නැත්තෙක් බව ඇය දැනගත්තේ කල්පනාගෙනි. මුදලට ඇති කෑදරකම හෙයින්ම එවන් මිනිසෙකුගේ කොන්ත්‍රාත්තුවකට සම්බන්ධ වීම විහින් විනාශයට අතවැනීමක් බව ශෙරීනාට වැටහෙන විට සියල්ලම සිදුවී හමාරය.ඉදින් තමා කෙසේ හෝ මේ මිනිසාගෙන් ගැලවිය යුතුය.දැන් කරන්නට ඇත්තේ සියල්ලන්ටම හොරෙන් විදේශයකට පැනගැනීම පමණි.ශෙරීනා වහ වහා ඇමතුමක් ගත්තේ තමා හඳුණන මිතුරියක් සතු සංචාරක ගමනාගමනය සම්බන්ධ ඒජන්සියකටය.

"මට ඉක්මනින්ම කැනඩාවලට ෆ්ලයිට් එකක් බුක් කරන්න."

ශෙරීනා පැවසුවේ තමාගේ පෙර වතාවේ වීසා තවම අවසන් නොමැති හෙයින් මේ කටයුත්ත ඉක්මනින් ඉවර කරගන්නටය.සියල්ලන්ටම හොරෙන් දින පහක් ඇතුලත කැනඩා යාමට ශෙරීනා සියලු වැඩකටයුතු සකසා ගත්තාය.

සියලු වැඩකටයුතු නිමාකරගත් පසු ශෙරීනාගේ මුවෙහි මතුවූයේ ජයග්‍රාහී සිනහවකි.

"කල්පනා උඹයි උඹේ ලොක්කයි දෙන්නා කරපු දේවල් වලට සම්බන්ධ වුනාට මට මෙහෙම වෙලා මදි.අන්තිමට මට දෙනව කීව සල්ලිත් නෑ.උඹ මට තර්ජනය කලා ඒ මදිවට.දැන් ඉතින් අල්ලයි මගෙ නැට්ට."

ශෙරීනා වියරු සිනහවක් පෑවේ කල්පනාගේ වදන් සිහිවීය.

"කොහොම උණත් ..මට විශ්ව කිසි වරදක් කලේ නෑ.ඒ නිසා මම ගියාට පස්සෙ විශ්වට මේ ඔක්කොම ඉන්ෆෝම් වෙන්න ශෙඩූල් ඊමේල් එකක් දාන්න ඕනෙ දැන්ම."

ශෙරීනා පරිගණකය අබියසින් හිඳගනිමින් සිතුවාය.

විශ්වගේ ජංගමය තවත් වරක් ඇමතුවද එය ක්‍රියාවිරහිතය.ඉදින් ඔහුට නොපවසාම ඉදිරි දින කිහිපය තමා සැඟවී සිටිය යුතුය.ශෙරීනා කැබ් රථ සමාගමකට ඇමතුමක් ගත්තේ කාර්‍යාල රථගාලටම වාහනයක් ගෙන්වා ගන්නටය.

මේ දින කිහිපය තමා අගනුවර හෝටලයක නවතින බව අම්මාට ඇමතුමක් දුන් ශෙරීනා කැබ් රියෙන් අදාල හෝටලය වෙත නික්ම ගියාය.

                                                                    *** 

කල්පනා සිය කණ හරහා වැදුණ තුන්වෙනි පහරට විසිවී ගොස් බිත්තියක වැදුණාය.ටෙරන්ස් නාගහවත්ත ඇයවෙත පැමිණ ඇයගේ බෙල්ලෙන් අල්ලා ඇදගත්තේය.

"උඹ මාත් එක්ක නටන්න ආවේ මං කවුද කියලා නොදැනද? "

සිය අතට ගෙල සිරව ගත් කල්පනාගේ බියපත් දෑස් දෙසම බලමින් ඔහු ගිගුරුවේය.

කල්පනා හුස්ම ගන්නට අපහසුවෙන් දඟලමින් දෑතම එක්කලාය.ටෙරන්ස් නාගහවත්ත ඇය ඉවතට තල්ලුකලේ පයින්ද පහරක් ගසමිනි.

"මේ ප්‍රොජෙක්ට් එක අතට ගත්තනම් මම ආයෙ ලංකාවම හොල්ලනවා ගෑණියෙ.උඹ ඒක දැන දැන ම වැඩේ බාරදුන්නේ කමකට නැති හෝන්තුවකට.අරුන් ඒකිව ගොනාට ඇන්දුවා.අද උන් ඇග්‍රිමන්ට්ස් සයින් කලා.මම ඉවරයි"

ටෙරන්ස් නාගහවත්ත අසල වූ පුටුවකට ඇද වැටුණේය.කල්පනා හිඳ උන් තැනම ඔහේ බලා උන්නාය.ඉදින් මේ නරුම මිනිසාගෙන් තමාහට කිසිම දිනක ගැලවීමක් නම් නොමැත්තේය.ඇය දෑසට පිරෙන කඳුළු පිසලමින් ඔහේ බලාඋන්නාය.

ටෙරන්ස් නාගහවත්ත සිය ජංගමයට ආ දුරකතන ඇමතුමකින් පසු පෑවේ වියරු සිනහවකි.ඔහු කාමරයේ ඇති රූපවාහිනිය ක්‍රියාත්මක කලේය.කල්පනා ඒ දෙස බැලුවේ ඉබේමය.

"මෙන්න විශේෂ පුවතක්...දැන් සුලු වේලාවකට පෙර දෙහිවල දුම්රිය මාර්ගය හරහා දැමූ කැබ් රථයක් දුම්රිය මාර්ගයේ සිරවීම හේතුවෙන් ඒ මොහොතේ ගාල්ල බලා ධාවනය වෙමින් තිබූ සමුද්‍රදේවී සීග්‍රගාමී දුම්රියේ හැපී එහි ගමන් ගත් තරුණියක් එතැනම මියගොස් ඇත.ඇය ප්‍රසිද්ධ ව්‍යාපාරික රියෙන්සි අතුකෝරල මහතාගේ දියණිය ශෙරීනා අතුකෝරල බව හඳුනාගන්නා ලදී.රියදුරු පොලිසියට කට උත්තරයක් දෙමින් ප්‍රකාශ කලේ වාහනය පණගන්වා ගන්නට නොහැකි වූ අතර තමා පිටතට පැනගත්තද ඇයට එසේ කරගන්නට නොහැකි වූ බවය...දෙහිවල පොලීසිය වැඩිදුර විමර්ශන අරඹයි."

තිරය මත වූයේ කැඩී තැලී ඇඹරී ගිය කැබ්‍ රථයයි.එම ප්‍රවෘත්තිය නැවත පරිගණක ක්‍රමවේදයන්ට අනුව සැකසූ උපකල්පන සමගින් ඉදිරිපත් වන විට ටෙරන්ස් නාගහවත්ත මහහඬින් සිනහසෙමින් රූපවාහිනිය ක්‍රියාවිරහිත කලේය.කල්පනා දෑස් විසල් කොට ගෙනම ඔහුදෙස බලාඋන්නාය.

"ඒකි යන්න උන්නෙ කැනඩාවට.දැන්ගියේ සුරපුරේට.මේ ටෙරන්ස් එක්ක හැප්පෙන්න වගේම රවට්ටන්න එන හැමඑකාටම අන්තිමට වෙන්නෙ ඕක තමයි.උඹත් ඒක මතක තියාගනින්."

ටෙරන්ස් නාගහවත්ත කල්පනා වෙත සිය දබරැඟිල්ල පාමින් පැවසුවේය.

                                                                                        *** 

ටෙරන්ස් නාගහවත්ත කාමරයෙන් පිට වී ගිය වහාම කල්පනා බිත්තියට අතගසා නැගිට්ටාය. ඒ නරුමයා පහරදුන් සියොළඟම වේදනාවෙන් පීඩිත ව ගොසිනි .විවිධාකාර හේතු අරබයා ටෙරන්ස් නාගහවත්ත මේ සම්පූර්ණ කාලය ඇතුළත තමාට කෙතරම් පහර දී ඇත්දැයි කල්පනාටම සිතා ගත නොහැකි තරම්ය . විශ්වවිද්‍යාල අධ්‍යාපනය ගතකල කාලයේදී තාවකාලික රැකියාවක් සඳහා තමා ටෙරන්ස් නාගහවත්ත වෙත අනුයුක්ත වූයේ දෛවයේ බලපෑමෙනි .එවකට ඉතා තරුණ වියේ සිටි ඔහු තමා සිය උගුලේ පටලවා ගත්තේ තමා සතු වූ විෂය දැනුම , කුසලතා භාවිතා කර ඔහුගේ අභිප්‍රායයන් මුදුන්පත් කර ගැනීමටය .

ඉතාම අගහිඟකම්වලින් යුතු මෙන්ම දරිද්‍රතාවයෙන් පිරුණු ජීවිතයක් ගතකළ කල්පනා ආර්ථික පහසුකම් ලබා ගැනීම උදෙසාම ටෙරන්ස් නාගහවත්ත විසින් තමා වෙත පැවරූ සුළු සුළු වංචනික කටයුතු නොපිරිහෙළා ඉටු කළේ එතරම් දුරදිග නොසිතාය. 

ඒ වනවිටත් ආපසු හැරෙන්නට බැරි තරමක් ටෙරන්ස් නාගහවත්ත සමග වූ සම්බන්ධතාවය දුර දිග ගොස් තිබූ හෙයින් කල්පනා ඔහුගේ අතේ නැටවෙන රූකඩයක්ම වූවාය .

ටෙරන්ස් නාගහවත්ත විසින් කල්පනා වෙත පැවරූ ප්‍රථම භාරදූර කාර්යය වූයේ විශ්ව ජයසූරියට ලංවී ඔහුගේ ව්‍යාපාර රහස් සියල්ල ඔහු වෙත ලබාදීමය.ඒ වෙනුවෙන් කල්පනා වසර තුනක් ගතකලාය.අවසානයේ විශ්ව අන්තිමටම බංකොලොත් වන්නට හැර ටෙරන්ස් නාගහවත්ත මැලේශියාවට ගියේ කල්පනාද සමගිනි.

කිසිදා විවාහයකට නොගිය අසම්මත බැඳීමක් පමණක්ම වූ කල්පනා සිය කෙලිබඩුවක්ම පමණක් නොව අන් ව්‍යාපාරිකයන් මුලාවේ දමන්නට හැකි අගනා ආයෝජනයක් ලෙස ටෙරන්ස් නාගහවත්ත සැලකීය. කෙතෙක් කායික මානසික පීඩා ලදද කල්පනාට ලැබුණේ සියලු සැපසම්පතින් පිරි සුඛෝපභෝගී ජීවිතයකි.ඉදින් ඇයද දුරදිග නොබලා ටෙරන්ස් නාගහවත්ත ගේ අවශ්‍යතාවයන් සැපිරුවාය.

ශෙරීනාගේ මරණය සැලසුම් කල නරුම අන්දම කල්පනා සසල කොට තිබුණි.කෙතරම් ධනයෙන් ආඪ්‍යවුවද තවකෙකුගේ ජීවිතය උදුරාගන්නට කෙනෙක් තැත් දරන්නේ මනුස්සකම බිංදුවටම සිඳුණ පසුවය.ඉතින් ටෙරන්ස් නාගහවත්ත සම්බන්ධව පිළිකුලක් මෙන්ම වෛරයක් කල්පනාගේ සිතේ උපදිමින් තිබුණි.

කල සැම පාපයක්ම තමා වටා කැරකෙමින් තමාහට පීඩා දෙන අන්දම කල්පනාට දරාගන්නට නොහැකි විය.ඉදින් තමා තවදුරටත් උන්නත් මලත් එකය යන අදහස කල්පනාගේ සිතතුල ඉපදී අවසන් විය.

                                                              *** 

විශ්ව සිය ජංගම දුරකතනය නැවත ක්‍රියාත්මක කලේ සියලු රාජකාරිමය කටයුතු අවසන් ව ආපසු කාර්‍යාලයට එන අතරේය.ශෙරීනාගෙන් ඇමතුම් රැසක් මෙන්ම අම්මාගෙන් මගහැරී ගිය ඇමතුම් විසිගානකි. විශ්ව ජංගමයේ මුහුණත නිසල්හට පෙන්වූයේ සිනාසෙමිනි.

"වැඩේ පත්තුවෙලාද බං...දෙන්නම අරන් තියෙන්නෙ."

නිසල් ඇසුවෙ සිනාසෙමිනි.විශ්වද දෙවුර සලා සිනාසුනේය.

"ශෙරීනා නම් අරන් තියෙන්නෙ උදේ ..ඔෆිස් නැති නිසා වෙන්න ඇති..ඒත් අම්මා දිගටම අරන්නෙ බං.මොකුත් අසනීපයක් වත්ද ?"

විශ්ව ජංගමයේ ඇමතුම් ආ වේලාවන් බලමින් පැවසීය.

"කෝකටත් ගනින්කො"

නිසල් පැවසුවේ කාර්‍යාල පරිශ්‍රයට වාහනය ඇතුල් කරමිනි.

විශ්ව අම්මාගේ ජංගම දුරකතනයට ඇමතුමක් ගත්තේය.

"කොහෙද බූරුවො ෆෝන් එකත් ඕෆ්කරන් ගියේ.අරකි එක්ක ඉන්න ඇති එකත් එකටම.."

අම්මා කෑගසා ඇසුවාය.ඇයගේ ස්වරයේ වූයේ හැඬුමකි.

"ම්...මොකක්...මොකක්ද අම්මා මේ කියන්නෙ...මම ෆොරීන් ඩෙලිගේට්ස්ලා එක්ක ඇග්‍රිමන්ට් එකක් සයින් කරන්න ගිහින් උන්නෙ.ඒකයි ෆෝන් එක ඕෆ් කලෙ.මොකක්ද වෙලා තියෙන්නෙ අම්මා...ඇයි?"

විශ්ව පෙර කල මෙන් තරහා නොගෙන කතාකලේය.

"අනේ දෙය්යනේ අර කෙල්ල..අර කෙල්ල ඉවරයි පුතේ.."

අම්මා මහාහඬින් හඬාවැටුණාය.විශ්ව කිසිවක් සිතාගන්නට නොහැකිව බලාඋන්නේය.අම්මා මේ පවසන්නේ කුමන විකාරයක්දැයි ඔහුට සිතාගන්නට නොහැක.

ඒ මොහොතේ කාර්‍යාලයේ කළමනාකරුවකු හා නිසල් පිවිසුම් දොර අසල කතාබහේ යෙදෙනුද නිසල් හිස අතගසා ගනුද විශ්ව දුටුවේය.එහා පසින් ඇසෙන්නෙ අම්මාගේ හැඬීමම විලාපදීමම පමණි.විශ්ව ජංගමය විසන්ධිකොට වහවහා නිසල් වෙත ආවේය.

නිසල් සිය අතෙහි වූ ජංගමයේ youtube දර්ශනය විශ්වටද පෙනෙන ලෙස නැරඹීය.ඔවුන් දෙදෙනා හිස්වල අතගසා ගත්තේ උනුන් දෙස බලමිනි.

"මේ ගෑනි දෙහිවල මොකට ගියාද බං.?"

නිසල් ඇසුවේ එම ප්‍රදේශය කාර්‍යාලය සහ ශෙරීනාහේ නවාතැන යන දෙකටම හාත්පසින්ම වෙනස්වූ එකක් හෙයිනි.

"අනික මේ ගිනිදවල් බීච්ගියා කියන්නද..? මොකක්ද බං වෙන්න ඇත්තෙ."

නිසල් විශ්ව දෙසම බැලීය.

"උඹට හිතෙන්නෙත් මට හිතෙන දේමද?"

විශ්ව ඇසුවේ නිසල්ගෙනි.ඔහු හිස ඉහලට පහලට සලා කල්පනාවේ යෙදුනේය.

"අපි යමුද ඉස්සෙල්ලම දෙහිවල පොලිසියට. "

විශ්ව ඇසුවේ නිසල්ගෙනි.

"ඔව් ඔෆිස් වෙහිකල් එකක ඩ්‍රයිවර් කෙනෙක් එක්ක යං.මේ විදියට අපි උඹේ වාහනේ ආව එකත් සෑහෙන්න ඩේන්ජරස් වැඩක්.ඊලඟ බිල්ල අපිද කවුද දන්නෙ"

නිසල් පැවසීය.

දෙහිවල පොලිස් ස්ථානය වෙත යනතෙක්ම දෙමිතුරන් උන්නේ කල්පනාවේ ගැලෙමිනි.

නිසල්ගේ මිතුරෙක් දෙහිවල පොලිසියේ සේවය කළ හෙයින් විශ්ව සහ නිසල්ට ඉක්මනින්ම ස්ථානාධිපතිවරයා හමුවීමට අවස්ථාව සැලසුණි.

"ඉඳගන්න මිස්ට ..අපි තාම investigations කරගෙන යනවා .ඒ වෙලාවෙ එතනින් වාහනය දාන්න කිසිම හේතුවක් තිබිලා නැහැ .නමුත් driver තවම හරියට මොකුත් කියන්නෙත් නැහැ. මිනිහා කියන්නේ ඔය නැතිවෙච්ච ලේඩි එකපාරටම beach side එකට වාහනේ දාමු කියලා කිව්වා කියලා. ඒත් වාහනේ රේල්පාර මැද්දෙ නැවතුනාම එයාට කොච්චර පනින්න කිව්වොත් එයා පැන්නෙ නැහැ කියලයි ඩ්‍රයිවර් කියන්නේ."

ස්ථානාධිපතිවරයා පැවසුවේ මේ දක්වා සොයාගත් විස්තරයි .

"ඇත්තෙන්ම කිව්වොත් ෂෙරීනා කියන්නේ අපේ ෆැමිලි ෆ්‍රෙන්ඩ් කෙනෙක් .එයා උදේ වරුවේ ඉඳලා තියෙන්නෙත් අපේ ඔෆිස් එකේ . ඒ ඉඳලා තමයි ඔහොම යන්න ගිහින් තියෙන්නෙ. අපිට මේ සිද්ධ වෙච්ච දේ ගැන සැකයක් තියෙනවා."

විශ්ව ස්ථානාධිපතිවරයාට පැවසුවේය .

"ඔව් අපි සීසීටීවී රෙකෝඩ්ස් ඔක්කොම බලනවා. මේක ගැන දුරටත් පරීක්ෂණ පැවැත්වෙනවා. දැනට බොඩි එකනම් තියෙන්නෙ කළුබෝවිල රෝහලේ .ඔයාලට අවශ්‍ය නම් ගිහින් බලන්න පුළුවන්. කෝකටත් ඔයාලා කටඋත්තරයක් දීලම යන්න."

පොලිස් ස්ථානාධිපතිවරයා ඔවුන්ට සමු දෙමින් පැවසීය.

"මොකද කියන්නේ හොස්පිටල් එකට යනවද .?"

නිසල් ඇසුවේ විශ්වගෙනි .

"නොයා බැහැනේ බං දැන් අතුකෝරල අංකල්ලත් ඔතනට ඒවිනෙ.ප්‍රශ්නෙ තියෙන්නෙ මේ මනුස්සයා උදේ අපේ ඔෆිස් එකේ ඉදලානෙ ඔතනට ගිහින් තියෙන්නේ .අපිටත් කටඋත්තරයක් දෙන්න වුන එක තමයි වැඩේ. අන්තිමට ඒ කුණු ගොඩත් අපේ පිටින් යාවිද දන්නේ නැහැ."

විශ්ව පැවසුවේ රියදුරු හට කලුබෝවිල රෝහල වෙත යන ලෙස පවසමිනි.

******************************************************************************** 

යලි හමුවෙමු 

කිත්මා වාසනා දහනායක 

(විසිරි සිහින)